თბილისის ნაწილსა და საქართველოს რამდენიმე რეგიონს ელექტროენერგიის მიწოდება დროებით შეუწყდა. საქართველოს სახელმწიფო ელექტროსისტემაში ნეტგაზეთს განუცხადეს, რომ დეტალები ზუსტდება.
“სომხეთთან დამაკავშირებელი ელექტროგადამცემი ხაზი ალავერდი გამოირთო, რამაც გამოიწვია ეს ამბავი. დეტალები დგინდება”, – გვითხრეს სახელმწიფო ელექტროსისტემაში.
უწყებაში აცხადებენ, რომ ელექტროენერგიის მიწოდება ეტაპობრივად აღდგება.
ელექტროენერგიის მიწოდება შეუწყდა თბილისის მეტროსაც.
“თბილისის სატრანსპორტო კომპანია გაცნობებთ, რომ თბილისის მეტროს საბურთალოს ხაზს 16:15 საათზე შეუწყდა ელექტროენერგიის მიწოდება სს „თელასისგან“, რის გამოც საბურთალოს ხაზი დროებით ვერ მოემსახურება მგზავრებს. ხაზზე მოძრავი ყველა მატარებელი მგზავრებისგან დაიცალა შესაბამის სადგურებზე. თბილისის მეტროს პირველი ხაზი (ვარკეთილი-ახმეტელის თეატრი) მუშაობას აგრძელებს ჩვეულ რეჟიმში. თბილისის სატრანსპორტო კომპანია ბოდიშს გიხდით შეფერხებისთვის”, – ნათქვამია განცხადებაში, რომელსაც თბილისის სატრანსპორტო კომპანია ავრცელებს.