თბილისის საქალაქო სასამართლომ 4 ნოემბერს თბილისში დაუმორჩილებლობის ბრალდებით დაკავებული ვეგან-აქტივისტ ირაკლი კიკილაშვილისათვის წარდგენილი ბრალდება უსაფუძვლოდ ცნო.
კიკილაშვილის თქმით, სასამართლომ საპატრულო ეკიპაჟის მიერ სასამართლო პროცესზე წარდგენილი მტკიცებულებები არასაკმარისად მიიჩნია, მათ შორის- დაცვის მხარის მიერ მოთხოვნილი დაკავების ამსახველი ვიდეომასალა.
აქტივისტი ადმინისტრაციულ სამართალდარღვევათა კოდექსის 173-ე მუხლით იყო დაკავებული, რაც “პოლიციელის კანონიერი მოთხოვნისადმი დაუმორჩილებლობას” გულისხმობს. აღნიშნული ითვალისწინებს 250 ლარიდან 2000 ლარამდე დაჯარიმებას ან ადმინისტრაციულ პატიმრობას 15 დღემდე. დაკავებულს საიას ადვოკატი იცავდა.
კიკილაშვილი 4 ნოემბერს, გვიან ღამით, დააკავა პოლიციამ. მისი თქმით, ქუჩაში ძაღლს ასეირნებდა, როდესაც პოლიციის თანამშრომლებმა გაჩხრეკა დაუპირეს, თუმცა კიკილაშვილმა მათ გაჩხრეკის ნებართვა არ მისცა, რაც მისი დაკავების საფუძველი გახდა.
