დღეს, 29 ოქტომბერს, ცესკოში გამართულ შემაჯამებელ პრესკონფერენციაზე განაცხადეს, რომ არჩევნების მეორე ტურები 2 229 საარჩევნო უბანზე ჩატარდება, მათ შორის 9 გამონაკლის შემთხვევაში შექმნილი უბანია.

ცესკოში აცხადებენ, რომ არჩევნების მეორე ტურში მონაწილეობას 2 478 042 ამომრჩეველი მიიღებს.

30 ოქტომბრის არჩევნების დაკვირვების მიზნით, ცენტრალურმა საარჩევნო კომისიამ გაუგრძელა აკრედიტაციის ვადა სადამკვირვებლო და მედიაორგანიზაციებს. ასევე, 7 მედიაორგანიზაციის 582-მა მედიაწარმომადგენელმა, 10 საერთაშორისო ორგანიზაციის 221-მა და 44 ადგილობრივი ორგანიზაციის 12 122-მა დამკვირვებელმა გაიარა რეგისტრაცია  მეორე ტურების დაკვირვების მიზნით.

ცესკოს პრესსპიკერის, ანა მიქელაძის თქმით, ყველა უბანს გადაეცა ყველა საჭირო ინვენტარი და დოკუმენტაცია და ხვალ, დილის 8 საათიდან ყველა უბანი მზად იქნება არჩევნების ჩატარებისთვის.

ანა მიქელაძის თქმით, მცირედ მხედველებისთვის იქნება 2 გამადიდებელი ლინზა, ხოლო უსინათლოებისთვის ჩარჩო-ფორმა, ფიზიკური შეზღუდვის მქონე ამომრჩევლებისთვის 754 უბანია ადაპტირებული, რომლებიც ხმის მიცემის სპეციალური კაბინებითაა აღჭურვილი.

“დაუშვებელია ამომრჩევლის არჩევანზე ზეგავლენის მოხდენა, მივმართავ ყველა ჩართულ მხარეს, ხელი შეუწყონ ამომრჩევლის ნების თავისუფალ გამოვლენას”, – განაცხადა ცესკოს პრესპიკერმა ანა მიქელაძემ.

საპარლამენტო არჩევნების მეორე ტურები იმართება 50 ოლქში. მათ შორის აჭარის უმაღლესი საბჭოს არჩევნების მეორე ტურები გაიმართება აჭარის ექვსივე ოლქში, ახალციხეში – მერის, ზუგდიდში, ხარაგაულსა და ბოლნისში გამგებლის რიგგარეშე არჩევნების მეორე ტურები ჩატარდება. ხოლო ლაგოდეხსა და სენაკში, საკრებულოს შუალედური არჩევნები გაიმართება.

საარჩევნო ადმინისტრაცია მზად არის არჩევნების პროფესიულ და ყველასათვის ხელმისაწვდომ გარემოში ჩასატარებლად, აცხადებენ ცესკოში.