დღევანდელი ბიუროს სხდომის ძირითადი საკითხები საბიუჯეტო ცვლილებების დარეგისტრირებას შეეხო, პარლამენტის თავმჯდომარის, ბაქრაძის განცხადებით, ეს ტექნიკური ცვლილებაა, ვინაიდან ახალი მთავრობის კაბინეტში შეიქმნა სახელმწიფო მინისტრის თანამდებობა დასაქმების საკითხებში:
“ამ ცვლილებებს, ბუნებრივია, სჭირდება აპარატი, დაფინანსება მუშაობისა და ფუნქციონირებისათვის და სწორედ ეს ტექნიკური ცვლილებაა სახელმწიფო ბიუჯეტში. არანაირად ეკონომიკურ პარამეტრებზე მაკროეკონომიკურ მაჩვენებლებზე არაფერი შეცვლილი არ არის, არის უბრალოდ დამატებული მინისტრის აპარატის ფუნქციონირების ხაჯი”, – განაცხადა დავით ბაქრაძემ.
საპარლამენტო უმცირესობის წევრის დიმიტრი ლორთქიფანიძის შეკითხვაზე, თუ კონკრეტულად რა ხარჯებზე და ხარჯთა ნაწილში რა სახის ცვლილებაზეა საუბარი, ბაქრაძემ უპასუხა:
“ბუნებრივია, ხარჯებში არსებობს ცვლილება და ეს ახალი მინისტრის აპარატის შექმნას უკავშირდება, რამდენი და როგორ, თუ ამის ინტერესი გაქვთ, ფინანსთა მინისტრის პირველი მოადგილე მზად იქნება, ხვალ მობრძანდეს და დეტალები თქვენთან ერთად განიხილოს”, – განაცხადა ბაქრაძემ.
ბაქრაძის თქმით, მთავრობის პროგრამა დღის ბოლომდე შევა პარლამენტში, ხოლო ხვალ, დღის პირველ ნახევარში ბიუროს სხდომაზე დარეგისტრირდება, შემდგომ კი მოკლე ვადაში მოხდება მისი პლენარულ სხდომაზე გატანა.
