“ჩვენს ოპონენტებს არ ესმით სოციოლოგიის მნიშვნელობა თანამედროვე საზოგადოებაში. სოციოლოგიურ კვლევებს დიდ ყურადღებას რომ აქცევდნენ, მაშინ ნახავდნენ, რომ მათი მომხრეთა მაქსიმალური რაოდენობა არის 20 პროცენტი. 4– მილიონიან ქვეყანაში 20 პროცენტი არის 800 ათასი, ქალაქში ეს შეიძლება იყოს 200–200 ათასზე მეტი. ამ აქციაზე მოვიდა რამდენიმე ათეული ათასი ადამიანი. ეს ყველაფერი არის ლოგიკისა და მოლოდინის ფარგლებში. პირველად ჩაატარეს და ამიტომ მაქსიმალურად ყველა მოვიდა. ეს აჩვენებს, რომ არჩევნები გვექნება კონკურენტული”, – აღნიშნა “ნეტგაზეთთან” დარჩიაშვილმა “ქართული ოცნების” 27 მაისის აქციის კომენტირებისას.

კითხვაზე, ხელისუფლებას პანიკის საფუძველი ხომ არ აქვს, დარჩიაშვილი აღნიშნავს, რა პანიკაზეა საუბარი, შეშფოთებას და რისკებს იწვევს რუსული ოკუპაცია და რუსული მანევრები: “ღმერთმა დაიფაროს, რომ ვინმეს გათვლა ჰქონდეს არა არჩევნებზე, არამედ არჩევნების შემდეგ არეულობაზე. ჩვენ ამომრჩეველი მეტი გვყავს და ჩვენი ხედვა ამ ქვეყნის განვითარების არის ძალიან მკაფიო”.

დარჩიაშვილის აზრით, ეს ხალხმრავლობა აჩვენებს, რომ ეს იქნება ქვეყნისთვის კონკურენტული არჩევნების მომტანი.

“თუ ყველაფერი კანონის ფარგლებში განახორციელეს ჩვენმა ოპონენტებმა, ეს იქნება ქვეყნისთვის კონკურენტული არჩევნები, რომელშიც, რა თქმა უნდა, ჩვენ გავიმარჯვებთ იმიტომ, რომ ჩვენ ამომრჩეველი მეტი გვყავს და ჩვენი ხედვა ამ ქვეყნის განვითარების არის ძალიან მკაფიო. მათი ხედვები, მაპატიეთ, მაგრამ წარსულისკენაა მიმართული”, – აღნიშნავს დარჩიაშვილი.

დარჩიაშვილი  ნინო ბურჯანაძის კოალიციის აქციაში შეერთებასაც გამოეხმაურა და აღნიშნა: “ღმერთმა მოახმაროთ ერთმანეთი. სამწუხაროა, რომ ამ კონკურენციას, რაც კარგია ქვეყნის განვითარებისთვის, არა მომავალზე ორიენტირებული ალტერნატიული ძალა, არამედ წარსულზე მომტირალი, კლანურ–ფეოდალურ წყობაზე მომტირალი ადამიანების დიდი ჯგუფი წარმოადგენს”.