აშშ აცხადებს, რომ ამერიკელი სამხედროების მიერ განხორციელებული სამი საჰაერო თავდასხმის შედეგად არაბეთის ნახევარკუნძულზე, იემენში 13 ალ-ყაიდას წევრია მოკლული.
ბიბისი აშშ-ის ოფიციალურ განცხადებაზე დაყრდნობით წერს, რომ 24 აგვისტოდან 4 სექტემბრამდე სულ 3 საჰაერო თავდასხმა განხორციელდა შაბვას გუვერნიაში, ცენტრალურ იემენში. განცხადებაში არაფერი წერია მოკლულთა ვინაობისა და თავდასხმის დეტალების შესახებ.
ალ-ყაიდა არაბეთის ნახევარკუნძულზე სამოქალაქო ომში იყო ჩართული . აშშ-ის განცხადებით, დაჯგუფება დიდ საფრთხეს წარმოადგენს როგორც რეგიონში, ასევე აშშ-სა და მის ფარგლებს გარეთ.
“აშშ არ შეწყვეტს მისიას, რათა შეამციროს, დაშალოს და გაანადგუროს ალ-ყაიდა და მისი ნარჩენები. ჩვენ მხარს ვუჭერთ ალ-ყაიდას დამარცხებას და აშშ-ის თავდასხმები იემენში კვლავ გაგარძელდება” – წერია განცხადებაში.
გავრცელებულ განცხადებაში ასევე საუბარია, რომ მიყენებული დარტყმა იყო ზეწოლა ტერორისტულ ქსელზე, რის შედეგადაც მოხდა აშშ-სა და მის მოკავშირეებზე დაგეგმილი თავდასხმის თავიდან არიდება.
იემენში კონფლიქტია ხელისუფლებასა და ხელისუფლების წინააღმდეგ ამბოხებულებს შორის. გაეროს ინფორმაციით, იემენში 2015 წლის მარტიდან დღემდე 7000-მდე ადამიანია დაღუპული, ხოლო იძულებითაა გადაადგილებული 2,5 მილიონი იემენის მოქალაქე – წერს BBC.
