საქართველოს პრეზიდენტი დღეს იმერეთში რამდენიმეწუთიანი ვიზიტით იმყოფებოდა, სადაც სამტრედია-ქუთაისი-ზესტაფონის შემოვლითი გზის მშენებლობას ჩაუყარა საფუძველი.

“ეს მაგისტრალი აეროპორტიდან 2,5 კმ-ით არის დაშორებული, რაც კიდევ უფრო კომფორტულია მოქალაქეებისთვის,” – განაცხადა მიხეილ საკაშვილმა.

საქართველოს რეგიონული განვითრებისა და ინფრასტრუქტურის მინისტრის თქმით, გზის მშენებლობის სამუშაოებზე 1500-მდე ადამიანი დასაქმდება, რომელთა უმრავლესობა ადგილობრივი მოსახლეობა იქნება. ქუთაისის 17.3 კმ-იანი ახალი, შემოვლითი გზა E60 ჩქაროსნული ავტომაგისტრალის ერთ-ერთი სეგმენტის – იმერეთის 59კმ-იანი შემოვლითი გზის შემადგენელი ნაწილია, რომელიც დაიწყება ზესტაფონიდან, გაივილს ქუთაისს, სამტრედიას და სამტრედია-ლანჩხუთი-გრიგოლეთის გზაზე დასრულდება.

“გზა იმერეთისთვის განსაკუთრებით მნიშვნელოვანია, რადგან პროექტის დასრულების შემდეგ ქუთაისი, ზესტაფონი და სამტრედია სატრანზიტო მოძრაობისგან განიტვირთება,”- აცხადებს იმერეთის გუბერნატორი ლაშა მაქაცარია.

ქუთაისის ახალი შემოვლითი გზის პროექტი სრულიად ახალი, ორზოლიანი მაგისტრალის მშენებლობას ითვალისწინებს. საგზაო მონაკვეთებზე დაიგება ცემენტ–ბეტონის, ხოლო ხიდებისა და საგზაო კვანძებზე ასფალტ-ბეტონის საფარი. გზის მშენებლობა საქართველოს საავტომობილი გზების დეპარტამენტის დაკვეთით ხორციელდება, აღნიშნული პროექტი ფინანსდება იაპონიისა (JICA) და საქართველოს მთავრობების მიერ.