“ქართული ოცნების” ლიდერების უკანონო თვალთვალში ბრალდებულები, შოთა ხიზანიშვილი, ვაჟა ლელუაშვილი და ლევან ქარდავა სასამართლომ დამნაშავედ ცნო – ამის შესახებ ინფორმაცია ნეტგაზეთს თბილისის საქალაქო სასამართლოში დაუდასტურეს.

შოთა ხიზანიშვილი სასამართლომ სამსახურებრივი უფლებამოსილების გადამეტებაში ცნო დამნაშავედ და 1 წლითა და 6 თვით თავისუფლების აღკვეთა შეუფარდა. ხიზანიშვილი სასამართლოს დარბაზშივე დააპატიმრეს.

მისი ადვოკატის, მამუკა ჯაზაშვილის განცხადებით, სავარაუდოდ, განაჩენს გაასაჩივრებენ:

“ის გარემოებები, რასაც პროკურატურა გვეუბნებოდა, თითქოს შოთა ხიზანიშვილმა ჩაიდინა, რომც დადასტურდეს, იქ არ გვქონდა გაგფლანგვის მუხლი, ეს მძიმე მუხლი, რომელიც 7-დან 11 წლამდე თავისუფლების აღკვეთას ითვალისწინებდა. მოსამართლემ გაიზიარა ჩვენი ეს მოსაზრება, თუმცა, არ დაგეთანხმა იმაში, რომ საერთოდ დანაშაული სახეზე არ იყო და ეს ქმედება დააკვალიფიცირა უფლებამოსილების გადამეტებით. დასაბითებულ განაჩენს როდესაც მივიღებთ და ჩავხედავთ, როგორ არის დასაბუთებული, ალბათ ამ ნაწილშიც გავასაჩივებთ,”- ამბობს ადვოკატი მამუკა ჯაზაშვილი.

სასამართლომ სამივე ბრალდებული დამნაშავედ ცნო მოხელის მიერ სამსახურებრივი უფლებამოსილების გადამეტების ჩადენის ნაწილში, რამაც ფიზიკური და იურიდიული პირის უფლების, ასევე სახელმწიფოს კანონიერი ინტერესების არსებითი დარღვევა გამოიწვია. სამივე მათგანს ამ მუხლით წარდგენილ ბრალდებაში სასჯელის სახედ და ზომად განესაზღვრა 2 (ორი) წლით თავისუფლების აღკვეთა, რაც ამნისტიის შესახებ საქართველოს კანონის შესაბამისად, შემცირდა ერთი მეოთხედით და განისაზღვრა 1 წლის და 6 თვის ვადით. მათვე  ჩამოერთვათ 2 წლის ვადით თანამდებობის დაკავების უფლება.