ბიძინა ივანიშვილი აცხადებს, რომ ქუთაისთან ახლოს, ტყეში, ქართუ საუნივერსიტეტო ქალაქს აშენებს. როგორც ივანიშვილმა დღეს, 14 ივნისს გამართულ პრესკონფერენციაზე განაცხადა, საუნივერისტეტო ქალაქი სახელმწიფოს საკუთრებაში იქნება და ქართუ მხოლოდ პროექტის დამფინანსებელია.

“ქუთაისთან ახლოსაა, უნიკალური ადგილია, ტყეში შენდება რეალურად. ცოტა დატბორილია ის ადგილი და მაგაზე გეოლოგები კვლევას აწარმოებენ. 200 000 ტონა ნალექია იქიდან გამოსატანი და გრუნტითაა შესავსები. მე ვუთხარი, რომ აუცილებლად მანდ უნდა გაკეთდეს, რადგან ეს უნიკალური ადგილია, რასაც ჰქვია საუნივერსიტეტო ქალაქი, როგორი ტენდენციაცაა საზღვარგარეთ, რომ ქალაქგარეთ გააქვთ ბუნებასთან ახლოს. თუმცა, სანამ მშენებლობა დაიწყება, წინასამუშაოები საკმაოდ ხარჯიანი იქნება. ჩემს თანხმობას ითხოვდნენ, გუშინ კიდევ ვესაუბრე და მივეცი თანხმობა”, – თქვა ივანიშვილმა.

“სახელმწიფოს საკუთრება იქნება თავშივე… სსიპი ან რაღაც გამოიკვეთება. ქართუ არაფრის საკუთრებაში არ შევა, მხოლოდ დამფინანსებელი იქნება, ისევე, როგორც დიღომში სამეცნიერო ცენტრის”.