ხარაგაულის მუნიციპალიტეტის სოფელ ბორითის სასწრაფო–სამედიცინო დახმარების კლინიკა, სხვა რაიონებში აშენებული საავადმყოფოების მსგავსად, ოფიციალურად, საზეიმო ვითარებაში, ამ დრომდე არ გახსნილა.

კლინიკაში ამ დროისთვის ხარაგაულის სასწრაფო დახმარების ერთი ბრიგადაა შესახლებული.

“როდის გაიხსნება ოფიციალურად კლინიკა, არ ვიცი”, – ამბობს ბორითის რწმუნებული ჯონი ხაჩიძე – “ეს შენობა სახელმწიფოს საკუთრებაა, რაიონის სასწრაფო იყო ცუდ პირობებში და გადმოიყვანეს აქ.”

ბორითის კლინიკის მშენებლობა ბიძინა ივანიშვილმა დააფინანსა 2 მილიონზე მეტი ლარით. სამშენებლო სამუშაოებს მისივე კუთვნილი კომპანიის “ატუ”–ს თანამშრომლები აწარმოებდნენ, რომლებიც გასული წლის 28 დეკემბერს ხარაგაულის გამგებელმა თორნიკე ავალიშვილმა შენობიდან გამოყარა.

“ჩვენ ვმუშაობდით ჩვეულებრივ, ვასუფთავებდით შენობას, მოვიდა ხარაგაულის გამგებელი, მოყვა ხუთი კაცი და გვითხრა, რომ შენობა დაგვეტოვებინა, გამოვედით შენობიდან გარეთ და მეტი მე არაფერი ვიცი. მას შემდეგ ესენი არიან შენობაში და ჩვენ ვართ გარეთ”, – ამბობს ბადრი კვინიკაძე, “ატუ”–ს სამუშაოთა მწარმოებელი.

მისივე თქმით, შენობაში სარემონტო სამუშაოები უკვე დასრულებული იყო და ობიექტის გახსნა ახალი წლის შემდეგ იგეგმებოდა.