საფრანგეთში, რუმინეთში, გერმანიასა და ბელგიაში წყალდიდობას მსხვერპლი მოჰყვა, ათასობით ადამიანი კი იძულებული გახდა, საკუთარი საცხოვრებელი ადგილი დაეტოვებინა.
ყველაზე მეტი მსხვერპლი – 10 ადმაიანი, წყალდიდობას გერმანიაში მოჰყვა, ორი ადამიანი გარდაიცვალა საფრანგეთში, ორი – რუმინეთში, ერთი – ბელგიაში.
როგორც BBC წერს, საფრანგეთის გარემოს დაცვის სამინისტროს ცნობით, 1862 წლის შემედეგ მდინარე სენას წყლის დონე 6 მეტრამდე არ აწეულა.
წყალდიდობის გამო დახურულია ლუვრისა და ორსეის მუზეუმები.
საფრანგეთის პრეზიდენტმა ფრანსუა ოლანდმა განაცხადა, რომ ამინდი გლობალური გამოწვევაა. პრეზიდენტი აპირებს, რომ ყველაზე მეტად დაზარალებული ადგილები სტიქიური უბედურების ზონად გამოაცხადოს.
პარიზში, მდინარე სენას გასწვრივ საგანგებო ბარიერები გააკეთეს, ვინაიდან მდინარე ზოგიერთ ადგილას კალაპოტიდან არის გადმოსული. მდინარე სენას გასწვრივ დაიხურა სარკინიგზო ხაზიც. პარიზსა და ცენტრალურ საფრანგეთში ელექტროენერგია 25 000 ადამიანს არ მიეწოდება.