კითხვაზე, “მიიღებთ თუ არა მონაწილეობას 2012 წელს დაგეგმილ საპარლამენტო არჩევნებში?” გამოკითხულთა 77,7%-ის განცხადებით, ისინი აუცილებლად მიიღებენ მონაწილეობას საპარლამენტო არჩევნებში; 11,4%-ის პასუხია – ალბათ მივიღებთ, 2,0% – ალბათ არ მივიღებ; 4,7% – გადაწყვეტილი მაქვს, არ მივიღო; 3,8 პროცენტი – ჯერ არ გადამიწყვეტია.
გამოკითხულთა უმრავლესობისთვის ხელისუფლების შეცვლა მხოლოდ არჩევნების გზით არის მისაღები. ეს რაოდენობა 75,7%-ს შეადგენს. რევოლუციის გზით არჩევნებამდე არსებული ხელისუფლების შეცვლა მისაღებია 3,2%-სთვის. გამოკითხულთა 3,6%-სთვის კი მისაღებია არსებული ხელისუფლების შეცვლა რევოლუციის გზით, თუ ხელისუფლებამ არჩევნები გააყალბა; 12,2% არსებული ხელისუფლების შეცვლას, ნებისმიერი გზით, მიუღებლად მიიჩნევს. კითხვაზე პასუხის გაცემა 5,3%-ს გაუჭირდა.
დღეს, 8 დეკემბერს, საქართველოს განვითარების კვლევითმა ინსტიტუტმა (GDRI) სასტურო “თბილისი მარიოტში” “სოციალური კვლევისა და ანალიზის” ინსტიტუტის მიერ ჩატარებული სოციოლოგიური კვლევის შედეგების პრეზენტაცია გამართა. სულ გამოიკითხა 3 000 რესპონდენტი საქართველოს 11 რეგიონში.
აღნიშნული გამოკითხვა 2011 წლის 11-22 ნოემბერს ჩატარდა, რომელიც ეხებოდა მოსახლეობის პოლიტიკური განწყობებისა და ქვეყანაში მიმდინარე პროცესების მიმართ ამომრჩეველთა დამოკიდებულების შესწავლას.
მთელი ქვეყნისთვის შერჩევის ცდომილება არ აჭარბებს 1,8%-ს 95%-იანი სანდოობით.
