ახალი ამბები

“სილქნეტი”: ე.წ. კაბელების საქმეზე პროკურატურის განცხადებები ჩვენთვის შეურაცხმყოფელია

18 მაისი, 2016 • 1369
“სილქნეტი”: ე.წ. კაბელების საქმეზე პროკურატურის განცხადებები ჩვენთვის შეურაცხმყოფელია

კომპანია „სილქნეტი“ ავრცელებს განცხადებას, სადაც აღნიშნულია, რომ კატეგორიულად არ ეთანხმებიან პროკურატურის მიერ ე.წ. „კაბელების საქმის” შესახებ გამოქვეყნებულ განცხადებაში „სილქნეტთან“ დაკავშირებით დასახელებულ ფაქტებს.

16 მაისს თბილისის საქალაქო სასამართლოს მოსამართლე ბესიკ ბუგიანიშვილმა სახელმწიფოს კუთვნილი 4 მილიონზე მეტი ლარის “სილქნეტის” სასარგებლოდ გაფლანგვაში ბრალდებულ თავდაცვის სამინისტროს მაღალჩინოსნებს: გიზო ღლონტს, ნუგზარ კაიშაურს, გიორგი ლობჟანიძეს, არჩილ ალავიძესა და დავით წიფურიას 7-7 წლით თავისუფლების აღკვეთა მიუსაჯა.

განაჩენის გამოცხადებიდან რამდენიმე საათში პროკურატურამ ვებ-გვერდზე გამოაქვეყნა ვიდეოკლიპი, სადაც საუბარია, რომ თავდაცვის სამინისტრომ ოპტიკურ-ბოჭკოვანი წვერების შეძენისას დაუსაბუთებლად მიანიჭა უპირატესობა კომპანია სილქნეტს და ბიუჯეტიდნ გაფლანგა 4 102 872 ლარი.

“სილქნეტი” აცხადებს, რომ პროკურატურის ეს განცხადება შეიცავს ისეთ ინფორმაციას, რაც მნიშვნელოვნად აზიანებს, როგორც „სილქნეტის“ იმიჯსა და საქმიან რეპუტაციას, ასევე, ზოგადად, ვნებს ბიზნესს ქვეყანაში.
მათ თავიანთ განცხადებაში პასუხი გასცეს პროკურატურის მიერ გავრცელებულ ვიდეოში მოყვანილ ფაქტებს:
“პროკურატურის განცხადებაში აღნიშნულია, რომ სს „სილქნეტმა“ 2 თვით ადრე იცოდა სახელმწიფო შესყიდვის დეტალები, ხოლო სხვა კომპანიებს მხოლოდ 9 დღე ჰქონდათ საკუთარი წინადადებების მოსამზადებლად. პროკურატურის განცხადების ეს ნაწილი წინააღმდეგობაშია თავად პროკურატურის დასკვნით სიტყვაში მოყვანილ გარემოებებთან, საიდანაც ირკვევა, რომ თბილისი-კოჯორი-ახალციხე-ბათუმის მიმართულებით „ოპტიკურ-ბოჭკოვანი კაბელების მიყვანის, ქსელური აპარატურის შეძენისა და მონტაჟის მოთხოვნა“ გაჩნდა მხოლოდ 2013 წლის 30 ივლისს. ბუნებრივია, აღნიშნული საჭიროების თაობაზე, მით უფრო, მის დეტალებზე, სს „სილქნეტს“ ორი თვით ადრე ვერ ეცოდინებოდა; სს „სილქნეტმა“, სხვა შესყიდვაში მონაწილე კომპანიების მსგავსად, შესყიდვის დეტალები 2013 წლის 27 აგვისტოს შეიტყო.
პროკურატურის განცხადებაში აღნიშნულია, რომ სს „სილქნეტის“ წინადადება არ შეესაბამებოდა სამინისტროს მოთხოვნებს, რასაც სს „სილქნეტი“ ვერ დაეთანხმება, ვინაიდან:
–  სახელმწიფო შესყიდვის საგანს წარმოადგენდა თბილისი-კოჯორი-ახალციხე-ბათუმის მიმართულებით „ოპტიკურ-ბოჭკოვანი კაბელების მიყვანის, ქსელური აპარატურის შეძენის და მონტაჟის მომსახურება“ და არა მაგისტრალის მშენებლობა;
–   სს „სილქნეტი“ არ იყო სახელმწიფო შესყიდვაში მონაწილე  ერთადერთი პირი; სს „სილქნეტის“ გარდა, ფასები წარადგინეს შპს „დელტაკომმა“ (10,498,200 ლარი),  შპს „ოპტიკ-ლაინმა“ (9,257,750 ლარი) და შპს „სპეცკავშირმა“ (12,886,226 ლარი). სს „სილქნეტმა“ წარადგინა 1 ძირითადი (მაგისტრალური არხის მშენებლობით) და 3 ალტერნატიული წინადადება. სს „სილქნეტის“ მიერ წარდგენილი შეთავაზებები სრულად შეესაბამებოდა სამინისტროს მოთხოვნებს, თუმცა ტექნიკური გადაწყვეტის სხვადასხვა ალტერნატივებს გულისხმობდა; ყველა ამ წინადადების ფასი გაცილებით ნაკლები იყო (5,800,000 – 6,800,000 ლარი, დღგ-ს გარეშე), ვიდრე სხვა მონაწილეების მიერ წარდგენილი ფასები.
სიმართლეს არ შეესაბამება ინფორმაცია, თითქოს შპს „დელტაკომს“ შეეძლო თავდაცვის სამინისტროსათვის იმავე მომსახურების უფასოდ შეთავაზება. თბილისი – კოჯორი – ახალციხე – ბათუმის მიმართულებით შპს „დელტაკომს“  სრულყოფილი საკაბელო ინფრასტრუქტურა არ გააჩნდა, რაც გამორიცხავდა მის მიერ ოპტიკურ-ბოჭკოვანი წვერების სამინისტროსათვის მიწოდების შესაძლებლობას.
დასანანია, რომ საქართველის მთავარი პროკურატურის განცხადებაში არაფერია ნათქვამი იმაზე, რომ სს „სილქნეტმა“ , გარდა ზემოაღნიშნული მომსახურებებისა, სამინისტროს სიმბოლურ  ფასად (თვეში – 1000 ლარი) შესთავაზა 21 წლის მანძილზე  ოპტიკურ-ბოჭკოვანი ინფრასტრუქტურის მომსახურება, მაშინ, როცა აღნიშნული მომსახურების საბაზრო ფასი თვეში დაახლოებით 20000 ლარია. მეტიც, სს „სილქნეტმა“, გარდა იმისა, რომ ყველაზე დაბალი ფასი შეთავაზა თავდაცვის სამინისტროს, ასევე იკისრა ვალდებულება, დამატებით რიგი სხვა მიმართულებებით სამინისტროს საკუთრებაში უსასყიდლოდ გადაეცა ოპტიკურ-ბოჭკოვანი წვერები, რაზეც სს „სილქნეტი“ დეტალურად ვერ ისაუბრებს, დოკუმენტაციაზე საიდუმლო გრიფის არსებობის გამო.
„სილქნეტის“ ყველა თანამშრომელი უკიდურესად შეურაცხყოფილია კომპანიის მიმართ არამართებული განცხადებებით და მოვლენების ამგვარი განვითარებით. სილქნეტი ემიჯნება ყოველგვარ პოლიტიკურ პროცესებსა თუ დებატებს. გვინდა, ჩვენი ადამიანური თანაგრძნობა გამოვხატოთ დაკავებულების და მათი ოჯახის წევრების მიმართ,”- ვკითხულობთ სილქნეტის განცხადებაში.

მასალების გადაბეჭდვის წესი