10 აქტივისტი ქუჩაში ანტიჰომოფობიური სტენსილების გაკეთების გამო დააკავეს.  ათივე მათგანი ადმინისტრაციულ სამართალდარღვევათა კოდექსის 150–ე მუხლით (სხვადასხვა სახის წარწერების, ნახატების, სიმბოლოების თვითნებური შესრულება შენობათა ფასადებზე, ვიტრინებზე, ღობეებზე, სვეტებზე, ხე-ნარგავებზე, ასევე პლაკატების, ლოზუნგების, ბანერების განთავსება ისეთ ადგილებზე, რომლებიც საამისოდ არ არის გამოყოფილი) დაკავეს, სამს კი 173–ე მუხლით (პოლიციელის კანონიერი მოთხოვნისადმი დაუმორჩილებლობა) გათვალისწინებულ სამართალდარღვევას ედავება პოლიცია.

10 დაკავებულიდან 3 მათგანი, რომელთაც მხოლოდ 150-ე მუხლით გათვალისწინებულ სამართალდარღვევას ედავებოდნენ, ხელწერილის საფუძველზე გაათავისუფლეს, მათი სასამართლო პროცესი კი გადაიდო. 7 აქტივისტი ამ დრომდე დაკავებულია და დღეს სწირედ მათი პროცესი გაიმართება.

“ძალიან მკაფიოდ ჩანს, სახელმწიფო რომელ მხარეს არის. 2013 წლის 17 მაისს სამღვდელოება რომ დასდვდა მოსაკლავად 30 აქტივისტს, მათ დასაჭერად წლები დასჭირდათ, ხოლო ჩვენ ყოველ წვრილმანზე დაგვდევენ კუდში. ეს აშკარად შერჩევითი სამრთალია,”- ამბობს სოფო ტაბატაძე.

დაკავებული აქტივისტების სოლიდარობის აქციას 10-მდე ადამიანი ესწრება.  მხარდამჭრების ნაწილი და ადვოკატები იმყოფებიან სასამართლოს შენობაშიც და პროცესის დაწყებას ელიან.

ჯერ არ არის ცნობილი, თუ რომელ საათზე დაიწყება პროცესი.

დღეს, 17 მაისს მსოფლიოს მრავალ ქვეყანაში ჰომოფობიასთან და ტრანსფობიასთან ბრძოლის დღეს აღნიშნავენ (IDAHO). 1990 წლის ამ დღეს მსოფლიო ჯანმრთელობის ორგანიზაციამ ჰომოსექსუალობა ავადმყოფობათა საერთაშორისო კლასიფიკაციიდან ამოიღო.წელს, 16 მაისს საქართველოში ლგბტი უფლებების დამცველმა ორგანიზაციებმა განაცხადეს, რომ  ჰომოფობიის დღის აღნიშვნას ვერ ახერხებენ, რადგანაც მათ პოლიციამ უსაფრთხოების გარანტიები არ მისცა.