ლადო პაპავა: ის [პატრიარქი] არაფერში არ ჩარეულა

უნივერსიტეტში აკადემიური საბჭოს შეხვედრის დასრულების შემდეგ რექტორმა ლადო პაპავამ ჟურნალისტების კითხვებს უპასუხა.

ნეტგაზეთის შეკითვაზე, თუ რა შეხვედრა ჰქონდა რექტორს სვეტიცხოველში უნივერსიტეტთან დაკავშირებით, პაპავამ განაცხადა:

“სვეტიცხოველში საუბარი არ იყო, დღეს გვქონდა პატრიარქთან შეხვედრა. მას აინტერესებდა რექტორისგან მოესმინა, რა ვითარებაა უნვერსიტეტში. მოისმინა. ბოლოს მოგვიწოდა ლოცვისაკენ. გვთხოვა, რომ 6 საათზე მივსულიყავით სვეტიცხოველში, სადაც იყო მსახურება და შევერთებოდით. მძიმე მარხვაა ამ კვირაში და მისი მოწოდება იყო სიმშვიდისკენ”, – განაცხადა პაპავამ.

თსუ-ს რექტორი ამბობს, რომ უნივერსიტეტის საქმეებში საპატრიარქო არავის არ ჩაურევია:

“არავის არ ჩაურევია [საპატრიარქო]. ეს იყო მისი ინიციატივა შეხვედროდა უნივერსიტეტის რექტორს. მადლობის მეტი რა მეთქმის. ის არაფერში არ ჩარეულა. უბრალოდ, მიიღო ჩემგან ინფორმაცია და მთხოვა, რომ ლოცვაზე შევერთებოდი მას”.

თსუ-ს რექტორმა ლადო პაპავამ დღეს განათლების სამინისტროში შეხვედრა მის დასრულებამდე დატოვა და განაცხადა, რომ სვეტიცხოველში მიდის. ჟურნალისტების კითხვაზე, თუ რატომ დატოვა თსუ-ს რექტორმა შეხვედრა მის დასრულებამდე, განათლებისა და მეცნიერების მინისტრმა თამარ სანიკიძემ ასე უპასუხა: “ის სხვა, მნიშვნელოვან შეხვედრაზე წავიდა ამავე თემაზე”.

ლადო პაპავამ აკადემიური საბჭოს ღამის შეკრების დასრულების შემდეგ განაცხადა, რომ მისი გადადგომის საკითხი არ დგას.

თბილისის სახელმწიფო უნივერსიტეტში მიმდინარე მოვლენების ქრონოლოგია იხილეთ ამ ბმულზე.

ნეტგაზეთის მასალების სხვა გამოცემებში გადაბეჭდვის წესი
ავტორი
მიშა მეფარიშვილი არის ნეტგაზეთის რეპორტიორი 2010 წლიდან. აშუქებს კულტურის პოლიტიკის, ადამიანის უფლებების საკითხებს და სხვა მიმდინარე თემებს. Email: mishameparishvili@gmail.com