აშშ-ის ჰელსინკის კომისიის თავმჯდომარე, რესპუბლიკელი სენატორი როჯერ უიკერი მხარდაჭერას უცხადებს პროტესტს საქართველოში, სერბეთსა და უნგრეთში.
„საქართველოში, სერბეთსა და უნგრეთში მოქალაქეები გამოდიან ქუჩებში კორუფციისა და ავტორიტარიზმის გასაპროტესტებლად. მე ვდგავარ ყველას გვერდით, ვინც იბრძვის დემოკრატიული მომავლისთვის. ლიდერებმა პატივი უნდა სცენ თავიანთი მოქალაქეების მოწოდებას ანგარიშვალდებულებისკენ, ნაცვლად იმისა, რომ კრემლის სტილის დარბევებით უპასუხონ“, — წერს უიკერი X-ზე.
In Georgia, Serbia & Hungary, citizens are taking to the streets to protest corruption & authoritarianism. I stand with all those fighting for a democratic future. Leaders must respect their citizens’ calls for accountability, rather than respond with Kremlin-style crackdowns.
— Senator Roger Wicker (@SenatorWicker) March 17, 2025
საქართველოში უწყვეტი პროტესტი მიმდინარეობს გასული წლის 28 ნოემბრიდან მოყოლებული, როდესაც „ქართულმა ოცნებამ“ ევროკავშირში გაწევრიანებისკენ სვლა შეაჩერა.
უკვე 4 თვეა სერბეთში მასობრივი აქციები მიმდინარეობს. პროტესტი მას შემდეგ დაიწყო, რაც 2024 წლის პირველ ნოემბერს ქვეყნის ჩრდილოეთში, ქალაქ ნოვი სადში, რკინიგზის სადგურზე ბეტონის ჭერის ჩამონგრევას 15 ადამიანი ემსხვერპლა. ნოვი სადის ტრაგედიის გამო სერბეთში საპროტესტო მოძრაობის მონაწილეები პრეზიდენტ ალექსანდრ ვუჩიჩისა და შესაბამისი პირების პასუხისმგებლობის დაყენებას ითხოვენ. პროტესტის ფონზე გადადგა სერბეთის პრემიერ-მინისტრი მილოშ ვუჩევიჩი, ინფრასტრუქტურის მინისტრი გორან ვესიჩი და დააკავეს 10-ზე მეტი ადამიანი.
15 მარტს უნგრეთში ორბანის პოლიტიკის წინააღმდეგ მასშტაბური საპროტესტო აქცია გაიმართა. 50 000-ზე მეტი ადამიანი გამოვიდა ბუდაპეშტის ქუჩებში ოპოზიციური პარტიის Tisza-ს მხარდასაჭერად, რომელიც ვიქტორ ორბანის პოლიტიკას აპროტესტებს.
