ამერიკის შეერთებულმა შტატებმა ბიძინა ივანიშვილი ფინანსურად დაასანქცირა.
ივანიშვილის სანქცირება მოხდა „რუსეთის ფედერაციის მავნებელ საგარეო ქმედებებთან“ დაკავშირებით გამოცემული პრეზიდენტის ბრძანების ფარგლებში, რომლის მიხედვითაც, სანქცირებული პირი ბრალდებულია, პირდაპირ თუ ირიბად, აშშ-სა თუ სხვა ქვეყნებში დემოკრატიული პროცესებისთვის ძირის გამოთხრაში, რუსეთის ფედეაციის სასარგებლოდ“.
ფინანსური სანქციები გულისხმობს, რომ დაიბლოკება ივანიშვილის ყველა აქტივი, რომელიც აშშ-ის იურისდიქციაშია ან კონტროლდება აშშ-ის მოქალაქის მიერ.
„აშშ-მა დაასანქცირა ბიძინა ივანიშვილი საქართველოს ევროატლანტიკური მომავლის ძირის გამოთხრისთვის, რუსეთის სასარგებლოდ. ივანიშვილისა და „ოცნების“ ქმედებებმა ძირი გამოუთხარეს დემოკრატიულ ინსტიტუტებს, დაუშვეს ადამიანის უფლებების დარღვევა, შეზღუდეს ფუნდამენტური თავისუფლებების გამოხატვა.
უფრო მეტიც — მათ გადაუხვიეს ევროატლანტიკური მომავლიდან, რომელსაც მხარს უჭერს ქართველი ხალხი და რომელიც აღბეჭდილია კონსტიტუციაში. შედეგად, საქართველო მოწყვლადია რუსეთის წინაშე, რომელსაც კვალაც ოკუპირებული აქვს საქართველოს ტერიტორიის 20%.
ჩვენ ვგმობთ „ოცნების“ ქმედებებს ივანიშვილის ხელმძღვანელობის ქვეშ, მათ შორის მიმდინარე და ძალადობრივ რეპრესიებს ოპოზიციის, მედიისა და აქტივისტების წინააღმდეგ“, — ნათქვამია აშშ-ის სახელმწიფო მდივნის, ენტონი ბლინკენის განცხადებაში.
