3 დეკემბრის აქციაზე სპეცრაზმელების მიერ დაშავებული მოქალაქეებიდან ერთი ამ დრომდე რეანიმაციაშია, ერთ-ერთს კი ოპერაცია ჩაუტარდა თვალზე. ეს უკანასკნელი მთარგმნელი დათა ხარაიშვილია. სულაკაურის გამომცემლობის ინფორმაციით, მას აქვს თვალბუდის მოტეხილობა და ტვინის შერყევა.
რეანიმაციულ განყოფილებაში იმყოფება ალექსანდრე თირქია. გავრცელებული ინფორმაციით, მას თვალში სპეცრაზმელის მიერ ნასროლი გაზის კაფსულა მოხვდა.
“21 წლის პაციენტი მიღებულია სკალპის ღია ჭრილობით, შუბლის ძვლის და თვალ-ბუდის ზედა კიდის კედლის მოტეხილობით, შუბლის წილის კონტუზიურ დაზიანებებით, თავის ტვინის გარსებში ტრავმული სისხლჩაქცევით. თვალის კაკლების მთლიანობა, ამ მომენტისათვის, დაზიანების გარეშე შენახულია. დაუყოვნებლივ გადაყვანილ იქნა საოპერაციო ბლოკში. ჩაუტარდა დაზიანებული ფრაგმენტების ამოკვეთა”, – ამბობს ინგოროყვას კლინიკის ექიმი ჟურნალისტებთან საუბრისას.
კლინიკაში იმყოფებოდა სახალხო დამცველი ლევან იოსელიანიც.
“მე ვნახე ადამიანები, რომლებიც არიან პალატებში და მითხრეს, რომ ერთი ადამიანი არის რეანიმაციაში. სამწუხაროდ, 80% ამ ადამიანების [დაკავებულების] არიან ნაცემები. ისინი მიუთითებენ პოლიციის მხრიდან ძალის გადამეტებაზე […] ადამიანი შეიძლება დააკავო და უნდა დააკავო, თუ არღვევს კანონს, ოღონდ არანაირი კავშირი ამასთან არ აქვს მის ცემას, თავში რტყმას, რაც არის დანაშაული. ვინც ამას აკეთებს, კანონის წინაშე უნდა აგოს პასუხი”, – განაცხადა სახალხო დამცველმა კლინიკის დატოვების შემდეგ.
ჯანდაცვის სამინისტროს ინფორმაციით, 2-3 დეკემბრის აქციიდან კლინიკებში სულ 26 მოქალაქე გადაიყვანეს. მათგან 23 აქციის მონაწილეა, 3 კი – პოლიციელი.
