“პოლიციის მხრიდან ძალის გამოყენებას უმეტესად ჰქონდა ანგარიშსწორების სახე და არ უკავშირდებოდა უკანონო წინააღმდეგობის ან სამართალდარღვევის აღკვეთას. ზოგიერთ შემთხვევაში, სამართალდამცავი უწყების წარმომადგენლებმა ძალის გადამეტების იმდენად მძიმე მეთოდები გამოიყენეს, რომ რამდენიმე დაკავებულს, დაზიანების სიმძიმიდან გამომდინარე, სამედიცინო დაწესებულებაში მკურნალობა და გადაუდებელი ოპერაციის ჩატარება დასჭირდა”, — ვკითხულობთ საიას ანგარიშში.

ორგანიზაცია პრობლემურად აფასებს სპეციალური საგამოძიებო სამსახურის მუშაობასაც. გარდა ამისა, მათი შეფასებით, დაკავებულთა ნაწილი თავს იკავებდა უწყებისთვის მიმართვისგან, “ვინაიდან არ ჰქონდათ გამოძიების სრულყოფილად, ობიექტურად წარმართვის და რაიმე კონკრეტული შედეგის დადგომის მოლოდინი”.

„ზოგიერთ შემთხვევაში, საჯარო წყაროებითაც კი იყო შესაძლებელი სავარაუდოდ დანაშაულის ჩამდენი პირების იდენტიფიცირება, სპეციალურ საგამოძიებო სამსახურსა და საქართველოს პროკურატურას თითქმის ორი თვის შემდეგაც არ გაუვრცელებიათ ინფორმაცია აქციებზე მოძალადე საპოლიციო ძალების წარმომადგენლების გამოვლენისა და ბრალდების შესახებ. ეს კი იმაზე მიუთითებს, რომ ეს უწყებები ეფექტიანად ვერ/არ ახორციელებენ საკუთარ უფლებამოსილებას“ ,— წერია ანგარიშში.

ორგანიზაციამ შეისწავლა ე.წ. ტიტუშკების (ხელისუფლების ორგანიზებული ძალადობრივი ჯგუფების) მოქმედება ბოლო კვირების განმავლობაში. საიას მიერ აღწერილია შემთხვევები, როცა „ტიტუშკები“ სცემდნენ დემონსტრანტებს, სახლთან ხვდებოდნენ აქციების ორგანიზატორებსა და მონაწილეებს და სასტიკად უსწორდებოდნენ მათ. ძალადობა იყო სტუდენტების მიმართაც. გამოიკვეთა პოლიტიკური, საქმიანობისა და მოსაზრების ნიშნით ოპოზიციური პარტიების წევრებისა და ჟურნალისტების დევნა.

მშვიდობიანი შეკრების თავისუფლება

საიას შეფასებით, რუსული კანონის საწინააღმდეგო აქციებზე სამართალდამცველთა მოქმედებები არ იყო კანონიერი და პროპორციული.

ორგანიზაციის წარმომადგენლები აქციების მიმდინარეობას აკვირდებოდნენ როგორც ადგილზე, ისე — მედიასაშუალების მიერ გავრცელებული კადრებით.