„მაქვს შეთავაზება იმ პარტიებთან, რომლებიც არც ნაცები ვართ და არც ქოცები, არც ამ ორი პარტიის ორბიტაზე ვტრიალებთ, ვილაპარაკოთ გაერთიანების გზებზე“ ,— აღნიშნულის შესახებ პარტია მოქალაქეების ლიდერმა ალეკო ელისაშვილმა განაცხადა.

როგორც პარტიის მიერ გამოგზავნილ განცხადებაშია ნათქვამი, ელისაშვილი გაერთიანებისაზე მოლაპარაკებებს სთავაზობს „ლელოს“, გიორგი გახარიას პარტიას „საქართველოსთვის“, „გირჩს“, ანა დოლიძეს და სხვა უპარტიო პოლიტიკოსებს:

„მაქვს შეთავაზება, იმ პარტიებთან, რომლებიც არც ნაცები ვართ და არც ქოცები, არც ამ ორი პარტიის ორბიტაზე ვართ, ვილაპარაკოთ გაერთიანების გზებზე. ე.წ. შუაშისტური ძალები, პროდასავლური პარტიები უნდა ვაცნობიერებდეთ, რომ ცალ-ცალკე შეიძლება ბარიერი გადავლახოთ, მაგრამ ხელისუფლებას ვერ შევცვლით. თუ ცვლილება გვინდა, პარტიული დღის წესრიგი დროებით გვერდზე უნდა გადავდოთ და საერთო კონტურებზე ვიფიქროთ.

ასეთ შუაშისტურ ძალებს შეიძლება 30-40%-იანი რესურსი გვქონდეს. ასეთ ძალად მოვიაზრებ ,,ლელოს“, გახარიას პარტიას, საპარლამანტო ,,გირჩს“, ანა დოლიძეს და კიდევ რამდენიმე უპარტიო ადამიანს. წესით, ახლა ყველა რაღაც საერთო კონტურებზე უნდა ვმსჯელობდეთ. მე პირადად მზად ვარ, დავჯდე ამ პარტიებთან სალაპარაკოდ“, — აცხადებს ალეკო ელისაშვილი.

„მოქალაქეების“ ლიდერის თქმით, ერთადერთი პარტია, ვისთანაც ამ ეტაპზე საუბრობენ, საპარლამენტო „გირჩია“, რომელსაც, მისი თქმით, აქვს მზაობა გაერთიანების გზების გამოძებნისთვის:

„ჩვენ ბევრ რამეში ერთმანეთს კატეგორიულად არ ვეთანხმებით, მაგრამ ვლაპარაკობთ იმაზე, რაც გვაერთიანებს, იმაზე, თუ როგორ ვხედავთ გამდიდრების გზას, სამართლიან და უსაფრთხო ქვეყანას და ა.შ. მინდა სხვებსაც მივმართო, შეწყვიტონ ერთმანეთზე თავდასხმები, შეიძლება ყველას ერთმანეთი გულზე არ გვეხატებოდეს, მაგრამ თუ ჩვენ პოლიტიკაში ვართ და ქვეყნის ბედზე პასუხისმგებლობას ვიღებთ, უნდა გავაცნობიეროთ ეს ისტორიული მომენტი, რომ თუ ახლა შევცვლით ხელისუფლებას, გაიხსნება მოლაპარაკებები და საქართველო გახდება ევროკავშირის წევრი. ძალაუფლების ცვლილება უნდა იყოს წყნარი და მშვიდი.

თუ ჩვენ ცვლილება გვინდა, კომპრომისებზე უნდა წავიდეთ, პირობა უნდა დავდოთ, რომ ეს რევანშიზმის გარეშე მოხდება, რომ ცვლილების შემდეგ არავის დავიჭერთ. ქონებას არავის წავართმევთ, სამსახურიდან არავის გავუშვებთ და ძალიან მომწონს ,,გირჩის“ იდეა, რომ თუ ვინმეს გავუშვებთ, სამი წლის კომპენსაციას წინასწარ მივცემთ. ამით აშინებს ოცნება საჯარო სამსახურში დასაქმებულებს. ამიტომ, თუ ჩვენ ცვლილება გვინდა, რევანშიზმს უნდა მოვეშვათ“, — აცხადებს ელისაშვილი.

ალეკო ელისაშვილი აცხადებს, რომ „პოლიტიკა კომპრომისების ხელოვნებაა და ზოგჯერ შეიძლება ისეთი ადამიანები დადგნენ ერთმანეთის გვერდზე, წარმოუდგენლად რომ მიგვაჩნია“:

„მე მზად ვარ კომპრომისისთვის, მოვუწოდებ სხვა ე.წ. შუაშისტურ პარტიებს, მარტო თავის დღის წესრიგზე და ბარიერის გადალახვაზე ნუ ფიქრობენ, რომც გადალახონ, მერე რას იზამენ? გაერთიანების გარეშე ცვლილება არ მოხდება. დღის წესრიგი ავაწყოთ საერთო კონტურის მოხაზვაზე და ცვლილების განხორციელებაზე“, – აცხადებს ელისაშვილი.

„ნეტგაზეთი“ ელისაშვილის ინიციატივასთან დაკავშირებით პარტია „ლელოს“ დაუკავშირდა, სადაც გვითხრეს, რომ ამ თემაზე კომენტარს არ გააკეთებენ. გიორგი გახარიას პარტიაში „საქართველოსთვის“ კი აცხადებენ, რომ ელისაშვილს ამ რჩევისთვის მადლობას უხდიან.