ბაღდათის მუნიციპალიტეტის სოფელ ნერგეეთში, ჩამოწოლილი მეწყრის ტერიტორიაზე სამძებრო-სამაშველო სამუშაოები გრძელდება. დილის 11 საათის მონაცემებით, ნაპოვნია 4 ადამიანის ცხედარი, 5 ადამიანს კვლავ ეძებენ.
ბოლო ინფორმაცია არსებული ვითარების შესახებ მედიას საგანგებო სიტუაციების მართვის სამსახურის უფროსმა თემურ მღებრიშვილმა მიაწოდა.
მისივე ინფორმაციით, ტერიტორიის სრულად გადამოწმებას დღის ბოლომდე შეძლებენ.
ადგილობრივთა ინფორმაციით, მეწყერში მოყოლილთა შორის 3 არასრულწლოვანია.
მეწყერი ნერგეეთში შუაღამისას, 02:00 საათზე ჩამოწვა.
დასავლეთ საქართველოში ორი დღეა, ძლიერმა ქარმა და ნალექმა პრობლემები გამოიწვია, დაიტბორა საცხოვრებელი სახლები, მაღალმთიან აჭარაში ჩამოწოლილმა მეწყერმა 6 თებერვალს რამდენიმე სახლი მოიყოლა, სადაც 2 ადამიანი დაიღუპა.