პოლონეთის საგარეო საქმეთა მინისტრ ზბიგნევ რაუს განცხადებით, საქართველოც ელოდება მის შესაძლებლობას ევროკავშირში გაწევრიანების გზაზე, თუმცა ქვეყნის საგარეო პოლიტიკის ზოგიერთი ასპექტი საჭიროებს კორექტირებას საერთაშორისო სამართლებრივ ნორმებთან შესაბამისობაში.
პოლონეთის საზოგადოებრივი მაუწყებლის ცნობით, ეს განცხადება რაუმ ბერლინში გააკეთა, სადაც ევროკავშირის გაფართოების საკითხზე გამართულ კონფერენციაში მონაწილეობდა.
მისი თქმით, საქართველომ მნიშვნელოვანი პროგრესი განიცადა კანონის უზენაესობის კუთხით, მაგრამ არსებობს გარკვეული მოლოდინები, განსაკუთრებით ისეთ პოლიტიკურ საკითხებთან დაკავშირებით, როგორიცაა ყოფილი პრეზიდენტის, სააკაშვილის მომავალი და ბედი, მისი ჯანმრთელობა და სხვა, მასთან დაკავშირებული საკითხები, რომლებიც პოლონეთისთვის მნიშვნელოვანია.
საქართველოს საზოგადოებრივი მაუწყებლის ინფორმაციით, რაუმ ასევე განაცხადა, რომ საქართველო იმსახურებს ევროპულ ოჯახში მიღებას.
ზბიგნევ რაუს განცხადებას გამოეხმაურა „ნაციონალური მოძრაობა“ და მადლობა გადაუხადა პოლონეთს იმისთვის, რომ „მუდმივად აყენებს პრეზიდენტ სააკაშვილის საკითხს საერთაშორისო არენაზე და საქართველოს მთავრობასთან ურთიერთობაში“.
„პრეზიდენტ სააკაშვილს თავისი გათავისუფლება საქართველოს მიერ ევროკავშირის წევრი ქვეყნის კანდიდატის სტატუსის წინაპირობად არ დაუყენებია. იმავდროულად, ჩვენი ევროპელი პარტნიორებისთვის გაუგებარია, როგორ უნდა გააგრძელოს წინსვლა ქვეყანამ, მათ შორის, ევროკავშირისა და ნატოს წევრობის მიმართულებით, თუ საქართველოში იქნება პოლიტიკური დევნა და მიხეილ სააკაშვილი დარჩება პატიმრობაში“, — განაცხადა ზურაბ ჭიაბერაშვილმა.
ენმ აცხადებს, რომ სტატუსის საკითხის გადაწყვეტის პარალელურად, იმისთვის, რომ საქართველომ ევროკავშირისა და ნატოს წევრობის გზაზე წინსვლა გააგრძელოს, „აუცილებელია საქართველოში პოლიტიკური დევნის დასრულება და პრეზიდენტ სააკაშვილის გათავისუფლება“.
