გიორგი კირთაძეს, „ერთიანი ნაციონალური მოძრაობის“ ბათუმის ორგანიზაციის თავმჯდომარეს, ტელეკომპანია „ფორმულას“ პირდაპირ ეთერში ჩართვის დროს, რამდენიმე სატელევიზიო კამერის წინ თავს დაესხნენ.
გიორგი კირთაძე აჭარის უმაღლესი საბჭოს დეპუტატია.
თავდამსხმელმა კვერცხი ესროლა და ხელი დაარტყა ოპოზიციური პარტიის რეგიონულ ლიდერს. მან სიტყვიერად შეურაცხყო ჟურნალისტებიც.
შემთხვევა ბათუმში, ვახტანგ გორგასლის ქუჩაზე, პრორუსული „ალტ-ინფოს“ ოფისის წინ მოხდა.
„რაფერ რა მინდა, პირდაპირ მოღალატე ხარ… მერე რა, რომ პირდაპირ ეთერში ვარ. შენ გიორგი კირთაძე ხომ ხარ? ჰოდა, ხელი გამიშვი. სახელი კი არა, მოღალატე ხარ ქვეყნის“, – მიმართა თავდამსხმელმა გიორგი კირთაძეს.
„ვინ გამოგიშვა, სახელი მითხარი“, – მიმართა თავდამსხმელს გიორგი კირთაძემ, თუმცა მან ვინაობა არ დაასახელა.
„ვინმეს არ გამოვუშვივარ, დამოუკიდებელი ქვეყნის მოქალაქე ვარ. რა სახელი, ბიჭო“, – ამბობს თავდამსხმელი.
ფორმულას თანახმად, თავდამსხმელს კიდევ ერთი კაცი ეხმარებოდა, რომელიც იქვე მდებარე „ალტ ინფოს“ ოფისიდან გამოვიდა.
ამ დროისთვის ადგილზე უკვე გამოჩნდნენ სამართალდამცველები.
შსს-ში ამ ეტაპზე არ ამბობენ, დაიწყო თუ არა გამოძიება.
