ჯანდაცვის სამინისტრომ კორონავირუსით ინფიცირებული ბავშვების მკურნალობის პროტოკოლში ცვლილებები შეიტანა.
შეცვლილი პროტოკოლის თანახმად, ბავშვის ჰოსპიტალიზაცია აუცილებელია, თუ მას 3-5 დღის განმავლობაში მუდმივად მაღალი ტემპერატურა ექნება.
ბავშვის კლინიკაში გადაყვანა საჭირო იქნება იმ შემთხვევაშიც, თუ დაავადების ხანგრძლივობა 1 კვირაზე მეტხანს გასტანს და პაციენტის მდგომარეობა არ უმჯობესდება ან მწვავდება.
პროტოკოლის თანახმად, რეკომენდებულია კორონავირუსით ინფიცირებული 1 წლამდე ასაკის ჩვილის ჰოსპიტალში გადაყვანა [როგორც კი ინფიცირება დაუდასტურდება].
სხვა კრიტერიუმებს შორის, რა დროსაც ბავშვის ჰოსპიტალიზაციაა საჭირო, გაწერილია:
- კლინიკურად ან რენტგენოგრაფიულად დადასტურებული პნევმონია;
- სუნთქვის უკმარისობა;
- თანარსებული ქრონიკული მდგომარეობა,
- ფილტვების ქრონიკული დაავადება (ზომიერი ან მძიმე ასთმა),
- გულსისხლძარღვთა დაავადებები,
- თირკმელების ქრონიკული დაავადება,
- ღვიძლის ქრონიკული დაავადება.
- ნერვ-კუნთოვანი დაავადება,
- ენდოკრინული დარღვევები (მაგ. შაქრიანი დიაბეტი),
- მეტაბოლური დარღვევები.
- იმუნოსუპრესიული პაციენტი (კიბო, ქიმიოთერაპია, სხივური თერაპია, ორგანოს გადანერგვა, იმუნომოდულაცია და გლუკოკორტიკოიდების მაღალი დოზა);
- მულტისისტემური ანთებითი სინდრომის და კავასაკის დაავადების მსგავსი კლინიკური მახასიათებლები;
- გასტროენტერიტის სურათი ზომიერი ან მძიმე დეჰიდრატაციით;
- მძიმე სიმსუქნე (სხეულის მასის ინდექსი ≥120% 95-ე პერცენტილზე).