“ეს ქუჩა დაკავებულია” – 17 მაისის აქცია თბილისში [ფოტო/ვიდეო]

“განსაკუთრებით სასტიკი დარბევა აქ, ამ ქუჩაზე მოხდა. არ იმსახურებს არც ეს ქუჩა და არც სხვა რომელიმე, რომ იყოს ასეთი სიძულვილის ადგილი. სიძულვილისგან, ჰომობფობიისგან, სექსიზმისგან თავისუფალი უნდა იყოს”, – ამბობს ნეტგაზეთთან საუბარში ლია ჯაყელი, დღევანდელი აქციის მონაწილე და დოკუმენტური ფილმის “ვაჩნაძის ქუჩა” რეჟისორი. 

დღევანდელი აქციის უსაფრთხოება, მათ შორის აქციის მონაწილეთა ტრანსპორტირება, სამართალდამცავებმა უზრუნველყვეს.

“პოლიციას მივმართეთ, საკმაოდ ადრე დავიწყეთ ამაზე საუბარი. არაერთგზის შეხვედრა გვქონდა და გავიარეთ უსაფრთხოების საკითხები. ვინაიდან ადამიანის უსაფრთხოება ისეთივე მნიშვნელოვანია, როგორც არის იდეა, რომლისთვისაც აქ ვდგავართ”, – ამბობს ეკა აღდგომელაშვილი, ქალთა ინიციატივების მხარდამჭერი ჯგუფის წარმომადგენელი. 

“ვაჩნაძის ქუჩაზე დღევანდელი აქცია გადავწყვიტეთ იმიტომ, რომ 2013 წლის 17 მაისს ვაჩნაძის ქუჩის კუთხეში 23 აქტივისტს თავს დაესხნენ, მათ შორის უმეტესობა იყო ქალი, რომელთაც საკმაოდ დიდი ზიანი მიაყენეს. სამმა ადამიანმა მიიღო ტვინის შერყევა. ფსიქოლოგიურ სტრესსზე აღარ მაქვს ლაპარაკი. ის კონსტიტუცია და ის კანონები, რომლებიც იცავს ყველა მოქალაქეს, უნდა გვიცავდეს ჩვენს, LGBT ადამიანებსა და ჩვენი თემის ადამიანებს”, – აცხადებს ნათია გვიანიშვილი, აქციის მონაწილე. 

17 მაისს ჰომოფობიასთან და ტრანსფობიასთან ბრძოლის დღეს (IDAHO) მსოფლიოს მრავალ ქვეყანაში აღნიშნავენ. 1990 წლის ამ დღეს მსოფლიო ჯანმრთელობის ორგანიზაციამ ჰომოსექსუალობა ავადმყოფობათა საერთაშორისო კლასიფიკაციიდან ამოიღო.  საქართველოში ამ დღის აღნიშვნას  2012 წლიდან ცდილობდნენ, თუმცა მშვიდობიანად შეკრების  შესაძლებლობა არ ჰქონდათ მართლმადიდებელი ეკლესიის პროტესტის გამო. 

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.

ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.

დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.

წესებსა და პირობებს დეტალურად შეგიძლია გაეცნო მხარდაჭერის პლატფორმაზე.