როგორც ღვინის ეროვნულ სააგენტოში აცხადებენ, უკანასკნელი 10 თვის განმავლობაში საქართველოდან მსოფლიოს 42 ქვეყანაში ექსპორტირებულია 28 101 431 ბოთლი (0,75 ლ) ღვინო, რაც თანხობრივად 77,2 მლნ აშშ დოლარს შეადგენს.
სააგენტოს ცნობით, ხაზგასასმელია ექსპორტის მკვეთრი, 87%-იაინი მატება სტრატეგიულად მნიშვნელოვან ჩინეთის ბაზარზე, სადაც საანგარიშო პერიოდში ექსპორტირებულია 1,8 მლნ ბოთლზე მეტი ქართული ღვინო. მათ ინფორმაციით, ჩინეთი ქართული ღვინის ექსპორტიორი ქვეყნების ხუთეულში მეოთხე ადგილს იკავებს რუსეთის, ყაზახეთისა და უკრაინის შემდეგ.
ღვინის ეროვნული სააგენტოს მონაცემებით, ექსპორტის ზრდა ფიქსირდება ევროკავშირის მთელ რიგ ქვეყნებში: პოლონეთი 2% (1 260 870 ბოთლი), ლატვია – 3% (924 792), ესტონეთი – 35% (389 274), გერმანია – 14% (211 236), ნიდერლანდები – 88% (47 232) და საფრანგეთი – 104% (29 100).
სააგენტოს ცნობით, ასევე, აღსანიშნავია ექსპორტის ზრდა ისეთ სტრატეგიულად მნიშვნელოვან ბაზრებზე, როგორიცაა აშშ – 26% (209 339), იაპონია – 19% (126 686), კანადა – 66% (147 636), ექსპორტი აგრეთვე გაიზრდა ყირგიზეთში – 168% (172 536), ისრაელში – 212% (33 720), კორეაში – 37% (24 054) და სხვა.
ღვინის ეროვნული სააგენტოს მონაცემებით, ექსპორტიორი ქვეყნების პირველი ხუთეული ასე გამოიყურება: რუსეთი – 14 660 981, ყაზახეთი – 4 004 586, უკრაინა – 2 569 249, ჩინეთი – 1 807 955 და პოლონეთი – 1 260 870 ბოთლი.
“რეგიონში არსებული ცნობილი პოლიტიკურ-ეკონომიკური მოვლენების გამო 2 უმსხვილეს ექსპორტიორ ქვეყანაში – რუსეთსა (-54%) და უკრაინაში (-61%) ექსპორტის მკვეთრი კლება აისახა 10 თვის ექსპორტის საერთო მაჩვენებელზე, რომელიც 2014 წლის ანალოგიურ პერიოდთან შედარებით 43%-ითაა შემცირებული,” – იტყობინება ღვინის ეროვნული სააგენტო.
ამასთან ერთად, სააგენტოს მონაცამებით, საანგარიშო პერიოდში 17 ქვეყანაში ექსპორტირებულია 5 450 321 ბოთლი (0,5 ლ) ბრენდი, რაც თანხაში 14,2 მლნ აშშ დოლარს აღწევს.
მათი ინფორმაციით, საქართველოდან მსოფლიოს 7 ქვეყანაში ექსპორტირებულია 7,1 მლნ ლიტრი საბრენდე სპირტი, რაც თანხაში 21,7 მლნ აშშ დოლარია.
ღვინის ეროვნული სააგენტოს ცნობით, განვლილ 10 თვეში მსოფლიოს 20 ქვეყანაში ექსპორტირებულია ასევე 104 580 ათასი ბოთლი (0,5 ლ) ჭაჭა. ეს კი თანხაში 403 ათასი აშშ დოლარია.
მთლიანობაში, ღვინის ეროვნული სააგენტოს მონაცემების მიხედვით, ღვინის, ბრენდის, ჭაჭის, ღვინომასალის, ჩამოსასხმელი ბრენდისა და საბრენდე სპირტის ექსპორტის შედეგად მიღებულმა შემოსავლებმა იანვარ-ოქტომბრის მდგომარეობით 115,6 მლნ აშშ დოლარს მიაღწია.
