2011 წელს ქვეყანაში 54 076 ბიზნეს–სუბიექტი დარეგისტრირდა (საშუალოდ თვეში 4 506 ერთეული), რომელთა შორის 97.7% სამეწარმეო სუბიექტია (ინდივიდუალური მეწარმე, სოლიდარული პასუხისმგებლობის საზოგადოება, შეზღუდული პასუხისმგებლობის საზოგადოება, სააქციო საზოგადოება, კომანდიტური საზოგადოება, კოოპერატივი, უცხოური სამეწარმეო იურიდიული პირის ფილიალი), ხოლო 2.3% – არასამეწარმეო სუბიექტი (არასამეწარმეო იურიდიული პირი, უცხოური არასამეწარმეო იურიდიული პირის ფილიალი).
2011 წლის დეკემბერში რეგისტრირებული ბიზნეს–სუბიექტების რაოდენობამ 5 430 ერთეული (5 284 სამეწარმეო და მხოლოდ 146 არასამეწარმეო სუბიექტი) შეადგინა. ამავე თვეში ბიზნესის რეგისტრაციის თვის ინდექსი 1.241 დონეზე დაფიქსირდა.
2011 წელს ბიზნეს–სუბიექტების რაოდენობა წინა წლის იმავე თვესთან შედარებით უპირატესად ზრდის ტენდენცია საშუალოდ 18.4 პროცენტია.
საჯარო რეესტრის ანალიტიკური ჯგუფის შეფასებით, 2011 წლის დეკემბრის თვეში ბიზნეს–სუბიექტთა უმეტესობა დარეგისტრირდა ინდივიდუალური მეწარმის სახით (3 718 ერთეული, ანუ რეგისტრირებულ ბიზნეს სუბიექტთა 68.5%). ამავე პერიოდში დარეგისტრირდა: 1 555 შეზღუდული პასუხისმგებლობის საზოგადოება, 145 არასამეწარმეო იურიდიული პირი, 7 უცხოური სამეწარმეო იურიდიული პირის ფილიალი, 2 სააქციო საზოგადოება, 2 კოოპერატივი და 1 საჯარო სამართლის იურიდიული პირი.
2011 წელს 12 თვეში რეგისტრირებულ ბიზნეს–სუბიექტების მთლიან რაოდენობაში 71.4 პროცენტს შეადგენენ ინდივიდუალური მეწარმეები (ანუ ყოველი 100 ბიზნეს სუბიექტიდან 71 დარეგისტრირდა ინდივიდუალური მეწარმის სახით), 25.9 პროცენტს – შეზღუდული პასუხისმგებლობის საზოგადოებები და 2.3 პროცენტს – არასამეწარმეო იურიდიული პირები. სხვა სუბიექტების წილები ბიზნეს–სუბიექტების მთლიან რაოდენობაში უმნიშვნელოა.