ნიღბების თეატრი, რომელიც ქუთაისში ფუნქციონირებს და ერთადერთია საქართველოში, შესაძლოა, შენობის გარეშე დარჩეს. ახალი პროექტი, რომლითაც რეაბილიტაცია უნდა ჩაუტარდეს იმ ბაღს, სადაც ეს შენობაა განთავსებული, თეატრის რეკონსტრუქციას არ ითვალისწინებს.
ქუთაისის ერთ-ერთ ძველ უბანში, საფიჩხიაზე მდებარე ხარაზოვების ბაღის რეაბილიტაციის პროექტირებაზე ჰოლანდიური კომპანია Dutch Design Garden-ი მუშაობს. ქუთაისის მერიაში აცხადებენ, რომ პროექტს, რომლის პრეზენტაციაც მაისში იგეგმება, ჰოლანდიური კომპანია უფასოდ ამზადებს.
რეაბილიტაციის პროექტის ფარგლებში მთლიანად უნდა შეიცვალოს ბაღის ინფრასტრუქტურა, მოწესრიგდეს გამწვანება, დაიგოს მწვანე საფარი და დამონტაჟდეს ახალი ტიპის განათების სისტემა. პროექტის ფარგლებში დაგეგმილია საფიჩხიის ტერიტორიული მართვის ორგანოს (მუნიციპალიტეტის) შენობის მშენებლობა.
„პროექტის პრეზენტაციის შემდეგ გავაკეთებთ ხარჯთაღრიცხვას და ტენდერს გამოვაცხადებთ. სავარაუდოდ, სრული რეაბილიტაციისთვის ნახევარი მილიონი ლარი იქნება საჭირო,“- ამბობს ქუთაისის მერიის კეთილმოწყობის სამსახურის უფროსი ლევან ჭანჭალეიშვილი.
ხარაზოვების ბაღში განთავსებული „ნიღბების თეატრის“ დირექტორი დავით ჯიშკარიანი ამბობს, რომ არ იცის, რა ბედი ეწევა თეატრს:
„შენობა ძალიან ცუდ მდგომარეობაშია. ბოლო პერიოდი ფოიეში გავდიოდით რეპეტიციას. კაპიტალური რესტავრაციაა საჭირო, ეს კი ძალიან ძვირი ჯდება. ალტერნატიული ფართის გამოყოფაც არავის უხსენებია. ალბათ, აიღებენ თეატრს და მის ადგილზე მუნიციპალიტეტს ააშენებენ.”
„თეატრის საქმე გაურკვეველია. კონკტერული გადაწყვეტილება არც შენობის დემონტაჟზე და არც ალტერნატიული ფართის გამოყოფაზეა მიღებული. ჩვენ აღება გვინდოდა, თუმცა კულტურული ძეგლია და სამინისტროს ბრძანებას ველოდებით. მათთან შეთანხმების გარეშე ვერაფერს მოვიმოქმედებთ.“
შენობის ავარიული მდგომარეობის გამო ბოლო პერიოდში თეატრის დასი მხოლოდ სკოლებში მართავს წარმოდგენებს. ამჟამად მათ რეპერტუარში თორმეტი სპექტაკლია, მსახიობები კი უხელფასოდ მუშაობენ. საქართველოში არსებული ერთადერთი ნიღბების თეატრი 1995 წელს დავით ჯიშკარიანმა დააარსა.
