10%-ს სჯერა, რომ ანტიდისკრიმინაციული კანონით ერთნაირსქესიანთა ქორწინება კანონიერია – კვლევა

“კავკასიის კვლევითი რესურსების ცენტრის” (CRRC-საქართველო) კვლევის მიხედვით, რომელიც ევროპის საბჭოს დაკვეთითა და დანიის საგარეო საქმეთა სამინისტროს დაფინანსებით მომზადდა, საქართველოს მოსახლეობის 10%-ს სჯერა, რომ ანტიდისკრიმინაციული კანონის მიხედვით, ერთნაირსქესიანთა ქორწინება კანონიერია.

კვლევის მიხედვით, კითხვაზე, კანონიერია თუ არა ერთნაირსქესიანთა ქორწინება ანტიდისკრიმინაციული კანონის მიხედვით, 1%-მა უპასუხა, რომ ზოგ შემთხვევაში. გამოკითხულთა 83%-მა კი იცოდა, რომ ანტიდისკრიმინაციულ კანონის შინაარსი ერთნაირსექესიანთა ქორწინებას არ ეხება.

კვლევის ფარგლებში ანტიდისკრიმინაციული კანონის შინაარსთან დაკავშირებით აღნიშნული რესპონდენტების მიმართ დაისვა ოთხი კითხვა:

  • ანტიდისკრიმინაციული კანონის მიხედვით, კანონიერია თუ არა ერთნაირ სქესიანთა ქორწინება? (არ არის კანონიერი);
  • ანტიდისკრიმინაციული კანონის მიხედვით, უკანონოა თუ არა დამსაქმებლების მიერ ადამიანებისთვის დასაქმებაზე უარის თქმა მათი კანის ფერის გამო? (უკანონოა);
  • ანტიდისკრიმინაციული კანონის მიხედვით, უკანონოა თუ არა დამსაქმებლების მიერ ადამიანებისთვის დასაქმებაზე უარის თქმა მათი სექსუალური იდენტობის გამო? (უკანონოა);
  • ანტიდისკრიმინაციული კანონის მიხედვით, უკანონოა თუ არა მედიის მიერ რელიგიური უმცირესობების მიმართ დისკრიმინაციის შემცველი მასალის გავრცელება? (უკანონოა).

“CRRC-საქართველომ” კვლევა შერეული მეთოდების გამოყენებით ჩაატარა. თვისებრივი მონაცემების შესაგროვებლად კვლევა ითვალისწინებდა ჩაღრმავებულ ინტერვიუებსა და ფოკუსჯგუფებს უმცირესობების სხვადასხვა ჯგუფისა და ეთნიკური ქართველების მონაწილეობით.

რაც შეეხება რაოდენობრივი მონაცემების შეგროვებას, ამ მიზნით, “CRRC-საქართველომ” ქვეყნის მასშტაბით ჩაატარა წარმომადგენლობითი კვლევა, რომლის მიღწეული შერჩევის ზომაც იყო 2 205 რესპონდენტი, ხოლო საშუალო ცდომილების ზღვარი – 2.9%. შერჩევა მოიცავდა საქართველოს იმ ტერიტორიების წარმომადგენლობით სამიზნე ჯგუფებს, სადაც მოსახლეობის ძირითადი ენაა სომხური ან აზერბაიჯანული.

კვლევა, წარმომადგენლობითია ქვეყნის მასშტაბით. გამოკითხვა 2018 წლის აგვისტოში ჩატარდა.

 

ნეტგაზეთის მასალების სხვა გამოცემებში გადაბეჭდვის წესი


ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.