ენგურჰესის კაშხალზე პირველი ტურისტული მარშრუტი გაიხსნა.
ტურისტულ მარშრუტზე, რომელსაც, როგორც “ენგურჰესში” აცხადებენ, პროფესიონალი გიდი გაუძღვება, ვიზიტორებს საშუალება ექნებათ, მოინახულონ თაღოვანი კაშხლის განსაკუთრებით საინტერესო მონაკვეთები, რომლებიც აქამდე დამთვალიერებლისთვის მიუწვდომელი იყო.
კომპანიის მიერ გავრცელებული ინფორმაციის მიხედვით, ტურისტული მარშრუტის ხანგრძლივობა დაახლოებით 2 საათს შეადგენს.
“კაშხლის ხიდი (გადასახედი), დისკური ფარების შენობა, კაშხლის 315-ე ნიშნულზე არსებული გვირაბი, სადაც ახსნილი იქნება კაშხლის სტრუქტურა და მისი გამორჩეული საინჟინრო თვისებები, ასევე მოინახულებენ ინჟინრული თვალსაზრისით უმნიშვნელოვანეს პერიმეტრალურ გვირაბსა და კაშხლის ფარების განყოფილებას, რომელიც წყალსაცავში წყლის დონეს არეგულირებს.
ამ საკმაოდ უჩვეულო და შთამბეჭდავი მარშრუტის გავლის შედეგად, ვიზიტორები შეიმეცნებენ თაღოვანი კაშხლის მოწყობის განსაკუთრებულ თავისებურებებს და გაეცნობიან ჰიდრორესურსების გამოყენებით ენერგიის წარმოშობის მთავარ ასპექტებს”.
კომპანიის ცნობითვე, ტურით სარგებლობა შესაძლებელია კვირის ნებისმიერ დღეს, ორშაბათის გარდა (სამშაბათი-კვირა). სამუშაო საათები: 11:00 სთ-დან – 5:00 სთ-მდე.
“ენგურჰესი” ელექტროენერგიით ამარაგებს როგორც ქართულ, ასევე აფხაზურ მხარეებს. “ენგურჰესი” ერთადერთი რეალური შეხების ობიექტია დღეს აფხაზურ და ქართულ მხარეებს შორის, რომელზეც ომის დასრულების შემდეგ არავინ დავობს. ქართულმა მხარემ საკუთარ თავზე აიღო მისი სრული დაფინანსება [დასავლური ორგანიზაციების ფინანსური დახმარებით] ჰესზე სარეაბილიტაციო სამუშაოებისთვის და ინფრასტრუქტურის უზრუნველსაყოფად.
