6 აპრილს ახალგორის რაიონში რუსეთის საინვესტიციო პროგრამის ფარგლებში 2015 წელს გარემონტებული კულტურის სახლი გაიხსნება.
კულტურის სახლის გახსნაზე ახალგორში ცხინვალელ ჩინოვნიკებს და მოწვეულ სტუმრებს ელოდებიან. გახსნამდე ერთი დღით ადრე ახალგორის ქუჩების კეთილმოწყობის სამუშაოები მიმდინარეობს.
ახალგარემონტებული და რეკონსტრუირებული კულტურის სახლი 212 მაყურებლზეა გათვლილი, შენობა ასევე მოიცავს 4 ადგილს შეზღუდული შესაძლებლობის მქონე პირებისთვის.
შენობის რეკონსტრუქცია, რემონტი და აღჭურვა, ოფიციალური მონაცემებით, 60 მილიონი რუბლი [დაახლოებით,1 მილიონი აშშ დოლარი] დაჯდა.
გახსნაზე საკონცერტო პროგრამით წარსდგება სამხრეთ ოსეთის ცეკვისა და სიმღერის სახელმწიფო ანსამბლი ”სიმდი”.
ახალგორის რაიონზე თბილისმა კონტროლი 2008 წლის აგვისტოს ომის შემდეგ დაკარგა.