ნეტგაზეთი | ზაქარეიშვილი პატიმრების გაცვლის საკითხში ხაჯიმბას როლზე საუბრობს ზაქარეიშვილი პატიმრების გაცვლის საკითხში ხაჯიმბას როლზე საუბრობს – Netgazeti
RU | GE  

ზაქარეიშვილი პატიმრების გაცვლის საკითხში ხაჯიმბას როლზე საუბრობს

შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა პატიმრების შეწყალების გამო სამხრეთ ოსეთს და აფხაზეთს მადლობა გადაუხადა.

“მოხარული ვარ, რომ შესაძლებელი გახდა გრძელვადიანი პატიმრების გათავისუფლება. მადლობელი ვარ ოსური და განსაკუთრებულად აფხაზური მხარის თანამშრომლობის. აფხაზებმა ძალიან კარგად იმუშავეს, განსაკუთრებით- რაულ ხაჯიმბამ. მინდა ხაზი გავუსვა მის პრინციპულ მიდგომას. ეს ძალიან მნიშვნელოვანია სამშვიდობო პროცესში. ჩვენ გვსურს ქართულ-აფხაზურ და ქართულ-ოსურ ურთიერთობებში ახალი ეტაპი დავიწყოთ, ჰუმანიტარული საკითხები ყოველთვის მნიშვნელოვანია. მე პროცესებით კმაყოფილი ვარ, მიუხედავად იმისა, რომ პროცესები დიდხანს, რამდენიმე თვეს გაგრძლდა”- განაცხადა Sputnik-abkhazia-სთან საუბარში ზაქარეიშვილმა. ზაქარეიშვილის აღნიშნული კომენტარის სისწორე ნეტგაზეთს მინისტრის აპარატის პრესსამსახურის წარმომადგენელმაც დაუდასტურა.

დღეს, 10 მარტს, ენგურის ხიდთან, გამყოფ ხაზზე ქართულ, აფხაზურ და ოსურ მხარეებს შორის სამშვიდობო პროცესის ფარგლებში პატიმრები გათავისუფლდნენ.

ოფიციალური ინფორმაციით, ქართულ მხარეს გადმოეცა აფხაზეთისა და სამხრეთ ოსეთის ტერიტორიაზე ბოლო 6-7 წლის განმავლობაში პატიმრობაში მყოფი საქართველოს 14 მოქალაქე. მათ სანაცვლოდ ქართულმა მხარემ ოსურ მხარეს 4 გათავისუფლებული პირი გადასცა.

“ენგურის ხიდთან, გამყოფ ხაზზე ქართულ, აფხაზურ და ოსურ მხარეებს შორის სამშვიდობო პროცესის ფარგლებში შედგა პატიმრების გათავისუფლება. აფხაზეთისა და სამხრეთ ოსეთის დე ფაქტო ხელისუფლებასთან მიღწეული შეთანხმების თანახმად, ქართულ მხარეს გადმოეცა აფხაზეთისა და სამხრეთ ოსეთის ტერიტორიაზე ბოლო 6-7 წლის განმავლობაში უკანონო პატიმრობაში მყოფი საქართველოს 14 მოქალაქე. მათ სანაცვლოდ ქართულმა მხარემ ოსურ მხარეს 4 გათავისუფლებული პირი გადასაცა”, – წერია განცხადებაში.

ბიოლი

ნეტგაზეთის მასალების სხვა გამოცემებში გადაბეჭდვის წესი
ავტორი
ელენე ხაჭაპურიძე არის ნეტგაზეთის რეპორტიორი 2011 წლიდან. აშუქებს პოლიტიკის, განათლების, ჯანდაცვის, ადამიანის უფლებებს და მიმდინარე მოვლენებს. e-mail ellen.khachapuridze@gmail.com