ახალი ამბები

უსუფაშვილის თქმით, რესპუბლიკური პარტიისთვის ქორწინება ქალისა და მამაკაცის ერთობაა

7 მარტი, 2016 • 1696
უსუფაშვილის თქმით,  რესპუბლიკური პარტიისთვის ქორწინება ქალისა და მამაკაცის ერთობაა

პარლამენტის თავმჯდომარის, დავით უსუფაშვილის განცხადებით, კონსტიტუციაში ქორწინების, როგორც ქალისა და კაცის ნებაყოფლობითი კავშირის, განსაზღვრებაზე “ქართულ ოცნებასა” და “რესპუბლიკურ პარტიას” განსხვავებული პოზიციები აქვთ:

“რესპუბლიკური პარტიის პოზიცია იყო და რჩება ის, რომ საქართველოს მოქმედი კანონმდებლობით, კონსტიტუციით, სხვა კანონებით საქართველოში ქორწინება არის მხოლოდ და მხოლოდ მამაკაცსა და ქალს შორის ნებაყოფლობითი კავშირი. არანაირი კანონი და არანაირი ნორმა იძლევა სხვაგვარი ინტერპრეტაციის საშუალებას. რესპუბლიკური პარტიის პოზიცია არის ის, რომ ქორწინება ეს არის მამაკაცის და ქალის ნებაყოფლობითი ერთობა და ამ საკითხს არც შეცვლა სჭირდება და არც გამაგრება.”

უსუფაშვილი ვარაუდობს, რომ საკონსტიტუციო ცვლილებების ინიცირება პრობლემას გაამწვავებს:

“ეს უნდა გაკეთდეს მხოლოდ იმ შემთხვევაში, თუ დარწმუნებული ვართ, რომ პროცესი ბოლომდე მივა. უშედეგო მცდელობა კონტრპროდუქტიული იქნება.  ჩვენ გაგებით მოვეკიდებით სხვების გადაწყვეტილებას, თუ დაიწყებენ ამ თემაზე საკონსტიტუციო ცვლილებების ინიცირებას და ჩვენი პარტია გააკეთებს განცხადებას, თუ რა არის მისი პოზიცია და რატომ თვლის, რომ ეს ინიცირება არის კონტრპროდუქტიული, შედეგის ვერმომტანი და პრობლემის გამამწვავებელი.”

პარლამენტის თავმჯდომარის თქმით, ამ საკითხზე დღეს “ქართული ოცნების” პოლიტსაბჭოს სხდომაზე იმსჯელებენ:

“ამ თემაზე კონსულტაციების შესაძლებლობა ამოწურულია და დღევანდელ პოლიტსაბჭოზე შეიძლება სხვა თემა არც იყოს და მხოლოდ ეს იყოს, შეიძლება პოლიტსაბჭო არც იყოს საჭირო, რადგან პოზიციები ნათელია.”

11 თებერვალს “ქართული ოცნების” ფრაქციის თავმჯდომარემ, გია ვოლსკიმ “ნეტგაზეთთან” საუბარში განაცხადა, რომ პარლამენტი საკონსტიტუციო ცვლილებების პროექტზე მუშაობს,  რომლის თანახმად, კონსტიტუციაში გაკეთდება ჩანაწერი, რომ   ქორწინება ოჯახის შექმნის მიზნით ქალისა და მამაკაცის ნებაყოფლობითი კავშირია:

“გარკვეული ჯგუფები სარგებლობენ კონსტიტუციის ამ ნაწილში კონკრეტიკის დეფიციტით და ამ თემას სპეკულაციებისთვის და პოლიტიკური დივიდენდების მისაღებად იყენებენ, მით უმეტეს წინასაარჩევნო პერიოდია. ყველა რელიგიური კონფესიისათვის მისაღებია ეს და გარდა ამისა, ეროვნული უსაფრთხოების საკითხია, სტაბილურობას და მშვიდობას უნდა შეუწყოს ხელი.”

______________________________________________________________________

მოვლენათა ქრონოლოგია

  • საქართველოს კონსტიტუციის 36-ე მუხლის პირველი პუნქტის მიხედვით, ქორწინება ემყარება მეუღლეთა უფლებრივ თანასწორობასა და ნებაყოფლობას.
  • 2012 წლის საქართველოს საპრეზიდენტო არჩევნების წინ ქრისტიანულ-დემოკრატიულმა მოძრაობამ მოამზადა საკონსტიტუციო ცვლილებების პროექტი, რომელიც ითვალისწინებდა კონსტიტუციის 36-ე მუხლის ცვლილებას შემდეგი რედაქციით: “სახელმწიფო აღიარებს მამაკაცისა და ქალის ქორწინებას, რომელიც ემყარება მეუღლეთა უფლებრივ თანასწორობასა და ნებაყოფლობას.“ ქდმ-მ ამ ინიციატივის მხარდასაჭერად მაშინ ხელმოწერების შეგროვება დაიწყო. ეს ინიციატივა ასევე გახდა ჰომოფობიაზე დისკუსიის საფუძველი.
  • 2014 წელს მაშინდელი პრემიერ-მინისტრი ირაკლი ღარიბაშვილი გამოვიდა ინიციატივით, კონსტიტუციაში შეეტანათ ჩანაწერი, რომ “ოჯახი არის ქალისა და მამაკაცის ერთობა” [სავარაუდოდ მას მხედველობაში ჰქონდა ქორწინება, რადგანაც “ოჯახი” საერთოდ არ გვხდება კონსტიტუციაში”. მაშინ ღარიბაშვილმა განაცხადა, რომ ოჯახის დეფინიციის კონსტიტუციით გამყარების ინიციატივა განხილული და მოწონებულია კოალიცია „ქართული ოცნების“ პოლიტსაბჭოს მიერ.
  • 2016 წლის 27 იანვარს მოქალაქე გიორგი ტატიშვილმა საქართველოს საკონსტიტუციო სასამართლოს მიმართა საქართველოს სამოქალაქო კოდექსის იმ ნორმის არაკონსტიტუციურად ცნობის შესახებ, რომელიც ქორწინებას მხოლოდ ქალსა და კაცს შორის აღიარებს.
  • 2016 წლის 7 თებერვალს საქართველოს მართლმადიდებელმა ეკლესიამ მიმართა შინაგან საქმეთა მინისტრს გიორგი ტატიშვილისთვის დაცვის გამოყოფის თხოვნით. ეკლესიამ განაცხადა, რომ ტატიშვილი არის ლგბტ საზოგადოების წარმომადგენელი და რადგანაც მოსახლეობის უდიდესი ნაწილი უარყოფითად არის განწყობილი “ასეთ კანონთან მიმართებაში” არის საშიშროება, რომ გარკვეული ძალების მიერ ეს მდგომარეობა იქნას გამოყენებული პროვოცირებისათვის და გიორგი ტატიშვილის სიცოცხლეს საფრთხე შეექმნას. შსს სამინისტრო არ ავრცელებს ინფორმაციას, გამოუყვეს თუ არა დაცვა გიორგი ტატიშვილს საპატრიარქოს თხოვნის საფუძველზე;
  • 2016 წლის 8 თებერვალს ლგბტ ორგანიზაციები ქორწინების თანასწორობასთან დაკავშირებით გიორგი ტატიშვილის ინიციატივას გაემიჯნენ და განაცხადეს, რომ გიორგი ტატიშვილს არ ჰქონია ლგბტ თემთან საკანონმდებლო ინიციატივაზე დისკუსია და იგი მოქმედებს არა ლგბტ ადამიანების, არამედ საკუთარი სახელით. მათი აზრით, ინიციატივა ქორწინების დეფინიციასთან დაკავშირებით პროვოკაციულია და ლგბტ ადამიანების უფლებების არა დაცვისკენ, არამედ მათი დაზარალებისკენ არის მიმართული.
  • 2016 წლის 9 თებერვალს, საინფორმაციო სააგენტო “ინტერპრესნიუსის” ცნობით, გია ვოლსკიმ განაცხადა, რომ საპარლამენტო უმრავლესობას მზად აქვს კანონპროექტი, რომლის მიხედვითაც კონსტიტუციაში გადავა ოჯახის ის დეფინიცია, რაც საქართველოს სამოქალაქო კოდექსშია.

 

მასალების გადაბეჭდვის წესი