„მე ავუხსენი კოლეგებს, რომ პროპორციულ სისტემაზე გადასვლა, ეს არის გათვალისწინებული არა 2020 წლისთვის, არამედ 2016 წლის შემდგომაზე, ანუ თუ მოხდება რიგგარეშე არჩევნები ან სხვა რამ, ჩვენ 2016 წლიდანვე ანუ შემოდგომის ბოლოდანვე გვექნება ახალი სისტემა, მაგრამ ამას სჭირდება გადაწყვეტილების მიღება. სამწუხაროდ, გადაწყვეტილების მიღებისთვის დრო რჩება ცოტა, იმიტომ, რომ საკონსტიტუციო ცვლილების განხორციელებას სჭირდება ორ სესიაზე გადაწყვეტილებების მიღება, სამი თვე, მათ შორის. ზაფხული უკვე იქნება ძალიან დატვირთული წინასაარჩევნო კამპანიით, ასე რომ, იმედია, ჩვენი კოლეგები ოპოზიციიდან, ბოლო-ბოლო დაინახავენ იმის საჭიროებას და აუცილებლობას, რომ ჩვენს მიერ ინიცირებულ საკონსტიტუციო ცვლილებებს სჭირდება მხარდაჭერა, სანამ სულ გვიან არ არის და სანამ ყველაფერი თავიდან არ დაიწყება 2016 წლის შემდეგაც, ისე, როგორც ეს ხდებოდა განვლილი 25 წლის განმავლობაში, როდესაც მოახლოებული არჩევნების წინ იყო მცდელობა სისტემის შეცვლის, ეს ვერ ხერხდებოდა და სისტემა გვრჩებოდა უცვლელი, ამიტომ, ჩვენ უნდა გადავდგათ ნაბიჯები იმისთვის, რომ ეს გადაწყვეტილება მივიღოთ ახლა, იმიტომ, რომ ამ გადაწყვეტილების მიღება მერე, არჩევნების შემდეგ, იქნება ისეთივე რთული, როგორც ეს რთული აღმოჩნდა ახლა, ანუ ცვლილება მაჟორიტარულიდან პროპორციულზე. ახლა, თუ ამ მოსაზრებას უკვე ერთი წელია, არ იზიარებენ და კიდევ არ გაიზიარებენ კოლეგები, მაშინ დავრჩებით ამ რეალობაში“,-განაცხადა საქართველოს პარლამენტის თავმჯდომარემ.

დღესვე, ვენეციის კომისიის წევრებმა და ეუთოს წარმომადგენლებმა  საპარლამენტო უმრავლესობისა და ოპოზიციის წარმომადგენლებს შეხვდნენ და მათი შენიშვნები მოისმინეს.