ადვოკატები, ომარ ფურცელაძე და მარიკა არევაძე დღეს, 6 ოქტომბერს, დღის სხვადასხვა მონაკვეთში, იმყოფებოდნენ რუსთავის მე-6 დაწესებულებაში. ციხის დატოვების შემდეგ ორივე მათგანმა გაავრცელა ინფორმაცია, რომ მათთვის მიწოდებული ცნობების მიხედვით, პატიმრები შიმშილობენ.
მარიკა არევაძემ დღეს გიორგი დავითაძე და საბა სხვიტარიძე მოინახულა, ომარ ფურცელაძემ – მისი დაცვის ქვეშ მყოფი, ბექა შენგელია.
„გიორგისთან მქონდა ხანგრძლივი საუბარი და ამ პირადი კომუნიკაციის შემდეგ ეჭვი არ მეპარება მისი მონათხრობის ნამდვილობაში. ბრძოლის განწყობაზეა !
როგორც შევიტყვე, პატიმრები შიმშილობენ. მათი მოთხოვნაა, რომ ვიდეომასალაში მყოფი ყველა ბადრაგი იქნას ჩამოშორებული საქმიანობას!“ – დაწერა არევაძემ სოციალურ ქსელში.
მან სახალხო დამცველს მოუწოდა, მოინახულოს მოშიმშილე პატიმრები.
ომარ ფურცელაძეს ბექა შენგელიამ მიაწოდა ინფორმაცია, რომ გიორგი დავითაძის ამბის გახმაურების შემდეგ ციხის ადმინისტრაციის კონკრეტული თანამშრომლები „ცდილობდნენ ფიზიკური დაპირისპირებების პროვოცირებას“ –
„რამდენიმე საათის განმავლობაში უწყვეტად აყენებდნენ სიტყვიერ შეურაცხყოფას საკანში მყოფ პატიმრებს, რასაც მოჰყვა კიდეც რამდენიმე ინციდენტი. ბექას ცნობით, ადგილზე შიმშილობს მინიმუმ 4 პატიმარი.ბექა, პროვოკაციის ან/და რაიმე უკანონო საგნის “ჩადების” თავიდან არიდების მიზნით, აპირებს არ დატოვოს საკანი.ბექა სრულ პასუხისმგებლობას აკისრებს ციხის ადმინისტრაციასა და იუსტიციის სამინისტროს მის სიცოცხლეზე, ჯანმრთელობასა და ყველა შესაძლო გართულებაზე“, – დაწერა ფურცელაძემ.
მისი განცხადებით, მოშიმშილე პატიმრებისა და ბექა შენგელიას მოთხოვნაა, „დაუყოვნებლივ შეწყდეს მათზე ყოველგვარი ზეწოლა, ხოლო, კონკრეტული ადმინისტრაციის თანამშრომლები დაუყოვნებლივ ჩამოაცილონ სამსახურებრივი მოვალეობის შესრულებას“.
ადვოკატის თქმით, მისი დაცვის ქვეშ მყოფი ითხოვს სახალხო დამცველთან შეხვედრას და ასე აპირებს მიაწოდოს საზოგადოებას კონკრეტული თანამშრომლების ვინაობა.
„ნეტგაზეთი“ დაუკავშირდა პენიტენციურ სამსახურს, უწყებაში განგვიცხადეს, რომ არ ადასტურებენ, რომ პატიმრები შიმშილობენ.
„ნეტგაზეთი“ ასევე დაუკავშირდა სახალხო დამცველის აპარატს, მათგან პასუხის მიღების შემთხვევაში მასალა განახლდება.
