მიქელაძე ციხეში შემოწმების პროცედურებს განმარტავს და ასახელებს კითხვებს, რომლებსაც გამოძიებამ უნდა უპასუხოს

• არასრული პირადი შემოწმებისას ხდება ადამიანის ტანსაცმლისა და ფეხსაცმლის შემოწმება/დათვალიერება, მაგრამ მისი გახდის გარეშე. ასეთი შემოწმება, მაგალითად, ტარდება სხვადასხვა პროცედურის წინ და შემდეგ, სხვა საკანში გადაყვანისას, აბაზანაში გაყვანისას და სხვა დადგენილ შემთხვევებში.
• სრული პირადი შემოწმება უკვე უფრო ინტენსიური ჩარევაა. ის მათ შორის ტარდება დაწესებულებაში მიღებისას, დაწესებულებიდან გაგზავნისას, სამარტოო საკანში მოთავსებისას, ხანგრძლივი პაემნის დაწყებამდე და დასრულების შემდეგ და სხვა დადგენილ შემთხვევებში“.

მიქელაძე წერს, რომ თუ შესაბამისი ინფრასტრუქტურა არსებობს, სრული შემოწმება ტარდება სკანერის გამოყენებით და მსჯავრდებულს წინასწარ უნდა მიეცეს შემოწმების საშუალების არჩევის შესაძლებლობა.

„სხვა მეთოდზე გადასვლა დასაშვებია მხოლოდ დადგენილი წინაპირობების არსებობისას, მათ შორის, როდესაც სკანერი აფიქსირებს აკრძალულ ნივთს ან არსებობს კონკრეტული და საფუძვლიანი ეჭვი, რომ პირს აკრძალული ნივთი სხეულზე ან სხეულში აქვს. ანუ შინაგანი შემოწმება ტარდება მხოლოდ აუცილებლობის შემთხვევაში, პირის სხეულში აკრძალული ნივთის არსებობის შესახებ საფუძვლიანი ეჭვის წარმოშობისას“, – წერს მიქელაძე.

„მოწმდება სხეული, ტანსაცმელი, ფეხსაცმელი და, არსებობის შემთხვევაში, პროთეზი. უფლებამოსილი პირის მითითების შემდეგ შეიძლება სხეულის შესაბამისი ნაწილების გახდაც, მაგრამ დებულება პირდაპირ ადგენს, რომ პირის სრული გაშიშვლება დაუშვებელია. ასევე განსაზღვრულია სხეულის ის ადგილები, რომლებიც შეიძლება შემოწმდეს, მათ შორის- თითებს შორის სივრცეები, ტერფები, ხელის მტევნები, კანის საფარი, ყურის ნიჟარები, იღლიები, პირის ღრუ და ცხვირის ნესტოები; ასევე მოწმდება თმა, ტანსაცმელი და ფეხსაცმელი.

დებულების მიხედვით, შინაგან შემოწმებას ატარებს სამედიცინო პერსონალი, სამედიცინო ეთიკის ნორმების დაცვით. ასეთი შემოწმება დასაშვებია მხოლოდ აუცილებლობის შემთხვევაში და მხოლოდ მაშინ, როდესაც არსებობს საფუძვლიანი ეჭვი, რომ პირის სხეულში აკრძალული ნივთია. ის უნდა ჩატარდეს იზოლირებულ ოთახში.

ანუ ბადრაგის ან დაწესებულების სხვა თანამშრომლების მიერ სხეულის ღრუში ხელით შეღწევა წარმოადგენს დებულების პირდაპირ დარღვევას“, – წერს უფლებადამცველი.