სასამართლომ არ დააკმაყოფილა დიუშენის მქონე ბავშებისთვის წამლის დაფინანსების მოთხოვნა – PHR

თბილისის საქალაქო სასამართლომ არ დააკმაყოფილა მოთხოვნა დიუშენის კუნთოვანი დისტროფიის მქონე ბავშვებისთვის წამლის დაფინანსების შესახებ. ამ ინფორმაციას ბავშვთა უფლებების დამცველი ორგანიზაცია “პარტნიორობა ადამიანის უფლებებისთვის” (PHR) ავრცელებს. ისინი აპირებენ, გადაწყვეტილება სააპელაციო სასამართლოში გაასაჩივრონ.

გარდა ამისა, ორგანიზაციაში ამბობენ, რომ სასამართლომდე ჯერ ჯანდაცვის სამინისტროს მიმართეს. თუმცა მოთხოვნა არცერთმა არ დააკმაყოფილა.

ორგანიზაციის შეფასებით, სახელმწიფომ ბავშვებისა და მშობლების სხვადასხვა უფლებები დაარღვია.

“საზოგადოებისთვის ცნობილია, რომ აქციის მონაწილეებს უარი ეთქვათ ისეთი აუცილებელი ნივთების გამოყენებაზე, როგორიცაა კარვები, პუფები და პლედები — საშუალებები, რომლებიც ბავშვებსა და მშობლებს უამინდობისგან და ჯანმრთელობის დამატებითი დაზიანებისგან დაიცავდა.

განვმარტავთ, რომ სახელმწიფოს ეკისრება პოზიტიური ვალდებულება, განახორციელოს შეზღუდული შესაძლებლობის მქონე ბავშვებისთვის, მათი ინდივიდუალური საჭიროების შესაბამისად, ყველა საჭირო მოქმედება ( გონივრული მისადაგება); ასევე, უზრუნველყოს მათი უფლებების რეალური განხორციელება და მხარდაჭერა, განსაკუთრებით მაშინ, როდესაც ბავშვები მშვიდობიან საპროტესტო აქციაში მონაწილეობენ.

აღნიშნულ საკითხზე ორგანიზაციას დაწყებული აქვს სამართალწარმოებაც, რადგან გაეროს ბავშვის უფლებათა კონვენციის თანახმად, ბავშვებს აქვთ მშვიდობიანი შეკრებისა და გამოხატვის თავისუფლება, რომლის ეფექტიანი დაცვაც სახელმწიფოს პოზიტიურ ვალდებულებას წარმოადგენს.

როგორც ბავშვთა უფლებებზე მომუშავე ორგანიზაცია, PHR დიუშენის კუნთოვანი დისტროფიის მქონე ბავშვების სიცოცხლისა და ჯანმრთელობის დასაცავად განაგრძობს სამართლებრივ მხარდაჭერას და გამოიყენებს ყველა სამართლებრივ საშუალებას. ასევე, ორგანიზაცია სრულ მხარდაჭერას უცხადებს ბავშვებსა და მშობლებს, მათ მშვიდობიან და უწყვეტ პროტესტს, რომელიც ბავშვების ფუნდამენტური უფლებების დაცვას ემსახურება”, – წერია PHR-ის განცხადებაში.