ახალი ამბები

ნონა გაფრინდაშვილი: ჩვენი მთავარი ამოცანაა, ხალხს შიში დავაძლევინოთ

15 ნოემბერი, 2010 • • 1376
ნონა გაფრინდაშვილი: ჩვენი მთავარი ამოცანაა, ხალხს შიში დავაძლევინოთ

სახალხო კრების დამფუძნებელი ყრილობა, რომელიც პარლამენტის წინ  25 ნოემბერს გაიმართება, შესაძლოა პერმანენტულ აქციებში გადაიზარდოს. მათი მთავარი მიზანი ხელისუფლების შეცვლაა. კითვაზე –როგორ, რა გზით და რა ფორმით აპირებენ ხელისუფლების ცვლილებას –პასუხი ჯერ არ არის. ნონა გაფრინდაშვილი, სახალხო კრების საინიციტივო ჯგუფის წევრი ამბობს, რომ სახალხო კრება 25 ნოემბერს მიიღებს გადაწყვეტილებას.

რატომ აარჩიეთ წარმომადგენლობითი სახალხო კრების ჩატარების თარიღად 25 ნოემბერი?

ასეთი გადაწყვეტილება, 25 ნოემბერთან დაკავშირებით, დიდი ხნის წინ იყო მიღებული. ასე რომ არაფერი განსაკუთრებულისთვის ეს თარიღი არ დაგვიმთხვევია. 25 ნოემბერს ვგეგმავთ სახალხო კრების ჩატარებას. კრება მიიღებს გადაწყვეტილებას, თუ რა მოხდება ამ დღეს.

რატომ გადაწყვიტეთ კრების პარლამენტის წინ გამართვა?

ხელისუფლებამ დაბრკოლება შეგვიქმნა, არ მოგვცა სპორტის სასახლე. გვიჭიანურებდა პასუხს ლოკომიტივის სტადიონთან დაკავშირებით. მივადექით ეკონომიკის სამინისტროს და ცხვირწინ ჩაგვიკეტეს კარი. როგორც იქნა იკადრეს, პრესსამსახური ჩამოვიდა და ლოკომიტივის სტადიონზე უარი გვითრა. ჩვენ არაფერი გვინდოდა, გარდა იმისა, რომ მიგვეღო პასუხი.

ჩვენ მანიფესტაციის ჩატარება კი არ გვინდოდა, კრების ჩატარება გვინდოდა.

ჩვენთვის უფრო რთული იქნება, მაგრამ რახან ასე გვიშლიან ხელს, ჩვენ უკვე მოვუწოდებთ ხალხს, არ აქვს მნიშვნელობა დელეგატები იქნებიან თუ არა, რომ მოვიდნენ პარლამენტის წინ.

შეიცვალა თუ არა ამ გადაწყვეტილებით თქვენი სამომავლო გეგმა?

არაფერი შეიცვლება. ჩვენ ჩავატარებთ კრებას. დელეგატების აღრიცხვა და სხვა პროცედურები, რაც საჭიროა კრებისთვის, ახლა უფრო რთულ პირობებში მოხდება, მაგრამ ჩვენ მაინც ჩავატარებთ და ამის მომსწრე იქნება ძალიან ბევრი ადამიანი. ამიტომ ჯობდა, სპორტის სასახლე მოეცათ.

როგორ ფიქრობთ, რამდენ ადამიანს შეკრებთ 25 ნოემბერს?

ჩვენ ველოდებით ძალიან ბევრ ადამიანს. რაც უფრო მეტი ადამიანი მოვა და მოაწერს ხელს, ეს ჩვენ ლეგიტიმაციას მოგვცემს.

სახალხო კრება ასოცირდება ერთ პოლიტიკურ პარტიასთან…

ეს არ არის სწორად დასმული კითხვა, არ ასოცირდება სახალხო კრება პოლიტიკურ პარტიასთან. უბრალოდ, კრებას ჰყავს მხარდამჭერი, ნინოს (ბურჯანაძე)  სახით. ჩვენ შემოგვიერთდა შალვა ხაჭაპურიძე და თეთრები, შაშიაშვილის სახით.

კრება არის ხალხის. დაისმება საკითხი, დაუჭერს ხალხი მხარს,  აიწევა ხელი და დაითვლება, როგორც ხდება ხოლმე.  გადაწყვეტილება, რასაც კრება მიიღებს, იქნება ხალხის გადაწყვეტილება და ყველაფერი, რასაც გადავწყვეტთ, იქნება იურიდიულ ჩარჩოებში, რომ არავინ არაფერში შემოგვედავოს.

სხვა პოლიტიკურ პარტიებთან რატომ არ მოხდა თანამშრომლობა?

ერთადერთი, ვისგანაც შემოთავაზება არ ყოფილა, ეს არის 8-ში ვინც არის, ფორუმის გამოკლებით. ფორუმი თავიდან თითქოს შემოგვიერთდა, მაგრამ საბოლოოდ განზე გადგნენ. მე მაინც დღესაც შემიძლია ვთქვა, რომ ნებისმიერი პარტია, რომელიც მოვა და გვერდით დაგვიდგება, ყველა მისაღებია.

ჩვენთვის მთავარია ერთი იდეის გარშემო გაერთიანება. თუ ესენი არ მოვაცილეთ ქვეყანას, საქართველოსგან არაფერი დარჩება. ჩვენ ვართ უბედურ დღეში და  ვიბრძვით საქართველოს ახალგაზრდა თაობების გადასარჩენად. ამ საინიციატივო ჯგუფში უფრო მეტი ჩემი ასაკის და ჩემზე უფრო დიდი ასაკის ადამიანები არიან. შეგვეძლო, სახლში ვმჯდარიყავით და დავმტკბარიყავით ცხოვრებით, მაგრამ ვინ მოგცემს ამის საშუალებას? ჩვენ თუ ქვეყანა არ გადავარჩინეთ, არაფერი გამოვა.

ახლა დავიწყეთ თბილისის რაიონებში მოძრაობა და ეს მოძრაობა გაგრძელდება 25 ნოემბრამდე და მერწმუნეთ, რომ ძალიან ბევრი ადამიანი გამოგვეხმაურება.

ანუ თქვენი მთავარი იდეა  ხელისუფლების შეცვლაა?

მთავარი იდეა კი არა, ძირითადი და ერთადერთი იდეაა. ჩვენ გვაქვს ტოტალიტარული რეჟიმი და ეს უნდა მოვაცილოთ საქართველოს.

და გაქვთ რაიმე კონკრეტული გეგმა?

გითხარით უკვე, რომ ამის შესახებ კრებაზე მივიღებთ გადაწყვეტილებას და ამ გადაწყვეტილებას შევასრულებთ.

ანუ ეს სპონტანურად მოხდება?

არა, სპონტანურად არ მოხდება. საკითხები იურიდიულად იქნება  მომზადებული. ჩვენ დავსვამთ კითხვას ხალხის წინაშე და ხალხი დაუჭერს მხარს.

ნურავინ გაიგებს, რომ ჩვენ 25–ში მოვედით და მორჩა საქმე. ჩვენ 25–ში ვიწყებთ ამ ხელისუფლების დემონტაჟს და ამისთვის ბრძოლას და ეს გაგრძელდება მანამ, სანამ ჩვენ არ მივაღწევთ მიზანს. როგორ და რა ხერხებით, ამას კრება გადაწყვეტს.

შესაძლებელია იყოს პერმანენტული აქციები?

რა თქმა უნდა.

თუ გაეცანით ირაკლი ოქრუაშვილის განცხადებას, სადაც ის ამბობს, რომ 25–ში კიდევ ერთი საპნის ბუშტი გაიბერება.

რატომღაც მრჩება შთაბეჭდილება, რომ გვიტევენ. ჩვენ ხომ არ გვითქვამს, რომ 25–ში გამოვდივართ და ვამთავრებთ? ამიტომ მისი შინაარსი იკარგება. საერთოდ, ოქრუაშვილის ადგილზე წყნარად ვიქნებოდი. შექმნა პარტია? კი, ბატონო. ჯერ პარტიამ რამე გააკეთოს. ძალიან ვთხოვ, იქიდან ნუ გვმოძღვრავს, მშვენივრად არის პარიზში მოკალათებული.

ცნობილი პოლიტიკური ოპოზიციური ფიგურების გარეშე, რამდენად მიაღწევს კრება წარმატებას?

ყველაფერი ხალხზეა დამოკიდებული. თუ დაინახეს, რომ სერიოზული ძალები მოვიდნენ, ძალიან ბევრი მერე გადადგამს ამ ნაბიჯს. ჩვენი მთავარი ამოცანაა, ხალხს შიში დავაძლევინოთ. დააკვირდით მოვლენებს საბერძნეთში, საფრანგეთში, ვინ გადაწყვიტა იქ მოვლენები? ხალხმა. პარტიებმა რაც გააკეთეს, ვნახეთ, რეალური არაფერი ჩანს. არც ერთ პარტიას არ მინდა დავუპირისპირდე, მაგრამ ვიძახი, რომ ყველაფერი ხალხზეა დამოკიდებული. პროდუქტებზე ფასებმა კატასტროფულად მოიმატა, მე არ ვიცი, რას უძლებს ეს ხალხი.

აქციებს საქართველოში, ძირითადად, მხოლოდ ერთი მოტივით მართავენ, ეს არის გადადგეს ხელისუფლება და არა ისეთი კონკრეტული პრობლემური საკითხები, როგოებიც თავად აღნიშნეთ, თუნდაც, პროდუქებზე ფასების მომატება.

ეს არ იქნება აქცია, ეს იქნება კრება, რომელიც მიიღებს კონკრეტულ იურიდიულ ჩარჩოებში მიღებულ გადაწყვეტილებას. ამ ხელისუფლებამ, რისი გაფუჭებაც შეიძლებოდა, უკვე ყველაფერი გააფუჭა. ჩვენს ინტერესებშია, რომ ჩვენ უკან იდგეს, ხელმოწერების საშუალებით, დიდი მასა და თუ ეს რაოდენობა იქნება სერიოზული, ჩვენ გადაწყვეტილებას ექნება სერიოზული ძალა.

რომ არ მოვიდეს ხალხის ის რაოდენობა, რა გეგმა გაქვთ?

აუცილებლად შეგროვდება. გავაგრძელებთ ბრძოლას იმისთვის, რომ შეგროვდეს, დაველოდოთ 25–ს. მიუხედავად ყველა წინააღმდეგობისა, ვფიქრობ, რომ ჩვენ ხალხი გამოგვეხმაურება.


ნონა გაფრინდაშვილი: სახალხო კრების საინიციატივო ჯგუფის წევრი.

მოჭადრაკე, ხუთგზის მსოფლიო და თერთმეტგზის ოლიმპიური ჩემპიონი. საერთშორისო დიდოსტატი ქალთა და ვაჟთა შორის. სპორტის დამსახურებული ოსტატი. საჭადრაკო ოსკარის მფლობელი. ფიდეს ქალთა კომისიის თვმჯდომარე. საქართველოს ეროვნული ოლიმპიური კომიტეტის პირველი პრეზიდენტი.

მასალების გადაბეჭდვის წესი