აზერბაიჯანის შსს-მ ოპერატიულ-სამძებრო ღონისძიებები ჩაატარა „Sputnik აზერბაიჯანის“ ოფისში – დაკავებულია რამდენიმე ადამიანი.
როგორც Trend იტყობინება, დაკავებულთა შორის არიან ბაქოს ფილიალის აღმასრულებელი დირექტორი იგორ კარტავიხი და მთავარი რედაქტორი ევგენი ბელოუსოვი.
ოფიციალური ინფორმაციით, აზერბაიჯანის შსს-მ დაიწყო გამოძიება ოპერატიული ინფორმაციის საფუძველზე, რომლის თანახმადაც საინფორმაციო სააგენტო „Россия сегодня“-ს ბაქოს განყოფილება („Sputnik აზერბაიჯანი“) განაგრძობდა საქმიანობას არაკანონიერი დაფინანსებით, მიუხედავად იმისა, რომ მისი აკრედიტაცია 2025 წლის თებერვალში შეჩერებული იყო.
აზერბაიჯანმა რუსული მედიაჯგუფის, Sputnik-ის პრესწარმომადგენლობა, 2025 წლის თებერვლის ბოლოს, სხვა საერთაშორისო მედიაგამოცემების პარალელურად დახურა. აზერბაიჯანის საგარეო საქმეთა სამინისტროს პრესსამსახურის მაშინდელი ინფორმაციით, რუსულ მედიაჯგუფს მხოლოდ ერთი კორესპონდენტის აკრედიტაციის მიღების შესაძლებლობა დარჩა.
აზერბაიჯანის შსს-ს განცხადებით, აღნიშნულთან დაკავშირებით დამატებითი ინფორმაცია მოგვიანებით გამოქვეყნდება.
