ახალგაზრდა ბიჭს, ლუკა კინწურაშვილს, რომელიც პოლიციამ თითქოს პრევენციის მიზნით გააჩერა, მობილურის დათვალიერება, კონკრეტულად კი ტელეგრამის ჩატზე წვდომა მოსთხოვეს. კინწურაშვილმა ადვოკატთან დაკავშირება გადაწყვიტა და დაურეკა სოციალური სამართლიანობის ცენტრის იურისტს, მარიამ პატარიძეს.

პატარიძემ მას განუმარტა, რომ პოლიციელებს ამის უფლება არ ჰქონდათ. ასევე, პოლიციელებს უთხრა, რომ დალოდებოდნენ მისი, როგორც კიწნურაშვილის ინტერესების დამცველს და თუ რაიმე საგამოძიებო მოქმედება ჰქონდათ დაგეგმილი, მისი თანდასწრებით ჩაეტარებინათ. ამის შემდეგ პოლიციელებმა კინწურაშვილს მობილური ძალით წაართვეს და დააპატიმრეს. ადვოკატი მას 6 საათის განმავლობაში ეძებდა.

“ნორმალურად არის, თუ გავითვალისწინებთ, რომ ფიზიკურ ძალადობას ადგილი არ ჰქონია. თუმცა, მობილური ტელეფონის წართმევის დროს აქვს მხარზე და მუხლზე დაზიანებები სისხლნაჟღენთების სახით. ადგილი ჰქონდა მის მიმართაც იძულებით გაშიშვლებას ორჯერ – პირველად პოლიციის განყოფილებაში, მეორედ – იზოლატორში.

შეაჩერეს, თითქოს, პრევენციის საფუძვლით. მოსთხოვეს ჩანთის გახსნა, რასაც დამორჩილდა თავისით. მხოლოდ მას შემდეგ გადაწყვიტა ჩემთან კომუნიკაცია, რაც ტელეგრამზე ჩატში წვდომა მოითხოვა პოლიციამ. ამაზე უპასუხა, რომ ადვოკატს გაესაუბრებოდა. მე უთხარი [პოლიციელს], რომ ადგილზე მივიდოდი და ჩემი მონაწილეობით ჩაეტარებინათ საპოლიციო ღონისძიებები. ამის შემდეგ მობილური წაართვეს ლუკას და გადაიყვანეს პოლიციის განყოფილებაში”, – გვითხრა მარიამ პატარიძემ.

როგორც იურისტი ამბობს, კინწურაშვილისთვის დეტალურად არ განუმარტავთ არც ჩანთის ჩხრეკის და არც მობილურის დათვალიერების საჭიროების საფუძველი. უთხრეს მხოლოდ ის, რომ მიმდებარე პერიმეტრზე მოხდა რაღაც და მიანიშნებდნენ, რომ სურდათ შემოწმება,  რაიმე კომუნიკაცია ხომ არ ჰქონდა სავარაუდო დანაშაულთან.

მარიამ პატარიძე

კინწურაშვილს პოლიციელებისთვის წინააღმდეგობა არ გაუწევია ჩანთის ჩხრეკისას, მობილურის შემოწმებისას კი ადვოკატის დასწრება მოითხოვა. სწორედ ამის შემდეგ დააკავეს პოლიციელისადმი წინააღმდეგობის მუხლით.

ადვოკატის ინფორმაციით, მას სამართალდარღვევის ოქმი 173-ე მუხლის მე-3 ნაწილით შეუდგინეს, რაც გულისხმობს იმავე ქმედების ჩადენას სახდელდადებული პირისთვის. თუმცა პატარიძე ამბობს, რომ კინწურაშვილს იმავე მუხლით ადმინისტრაციული სახდელი არ ჰქონია.

ლუკა კინწურაშვილი “პრევენციის მიზნით” გააჩერეს, შემდეგ კი დააკავეს გასულ წელსაც. მის ინტერესებს მაშინაც სოციალური სამართლიანობის ცენტრი იცავდა. როგორც მარიამ პატარიძემ განგვიმარტა, 2024 წლის ივლისში კინწურაშვილი გამართლდა პოლიციელებისთვის წინააღმდეგობის გაწევის მუხლში, ხოლო მათთვის შეურაცხყოფის მიყენებისთვის სამართალდამრღვევად ცნეს, მაგრამ მოსამართლე მხოლოდ შენიშვნით შემოიფარგლა.

“სიტყვიერი შენიშვნა ნიშნავს, რომ ის ადმინისტრაციული პასუხისმგებლობისგან გათავისუფლებულია”, – განმარტავს ადვოკატი და ამატებს, რომ მოსამართლემ შეურაცხყოფად ჩათვალა სიტყვა “თავხედის” გამოყენება პოლიციის მისამართით.