ევროპული საბჭოს პრეზიდენტმა, ანტონიო კოშტამ ევროკავშირის გაფართოებაზე საუბრისას საქართველო არ ახსენა.
ანტონიო კოშტა ევროპის პოლიტიკის ცენტრში სიტყვით გამოვიდა, სადაც ევროკავშირის ისტორიაზე და მის წინაშე არსებულ გამოწვევებზე ისაუბრა.
აღნიშნული გამოსვლისას ევროპული საბჭოს პრეზიდენტი ევროკავშირის გაფართოების საკითხსაც შეეხო და აღნიშნა, რომ ამ კუთხით დასავლეთ ბალკანელებთან, უკრაინასთან და მოლდოვასთან მუშაობენ. თუმცა არ უხსენებია საქართველო, რომელსაც კანდიდატის სტატუსი აქვს. „ქართული ოცნების“ ხელისუფლების გადაწყვეტილებით, ევროინტეგრაციის პროცესი 2028 წლამდე შეჩერდა.
„მტკიცედ ვმუშაობთ გაფართოებაზე ჩვენს დასავლეთ ბალკანელ მეზობლებთან, უკრაინასთან და მოლდოვასთან. გაფართოება არის საუკეთესო გეოპოლიტიკური ინვესტიცია, რომლის განხორციელებაც ევროკავშირს შეუძლია. ამიტომ ოთხ თვეში ორჯერ ვიყავი უკრაინაში. მარტის დასაწყისში მოლდოვას ვესტუმრე და წელს ორმხრივ სამიტს გავმართავთ. სწორედ ამიტომ, პირველი სამიტი, რომლის თავმჯდომარეც მე ვიყავი, იყო დასავლეთ ბალკანეთთან, რეგიონთან, რომელსაც მაისში ვეწვევი“, – განაცხადა ანტონიო კოშტამ.
