უკრაინის პრეზიდენტი ვოლოდიმირ ზელენსკი ამბობს, რომ უკრაინის შეიარაღებული ძალები განაგრძობენ წინსვლას კურსკის ოლქში და მიმდინარეობს სტრატეგიული მიზნის მიღწევა. კონკრეტულად რა მიზანი აქვს კიევს, ამ ეტაპზე უცნობია.
„დღეს გვაქვს წინსვლა კურსკის ოლქში, ვაღწევთ ჩვენს სტრატეგიულ მიზანს. საკმაოდ შევავსეთ ჩვენი სახელმწიფოსთვის [ტყვეთა] გაცვლის ფონდი.
ჩავატარე თათბირი მთავრობის წევრებთან კურსკის ოლქის ტერიტორიაზე ჩვენი სამხედროების მხარდაჭერის საკითხზე. მნიშვნელოვანია, რომ უკრაინა წესების მიხედვით ომობს და იმ ტერიტორიაზე არსებული ჰუმანიტარული მოთხოვნილებები უნდა დაკმაყოფილდეს“, – ციტირებს მას „უკრაინსკა პრავდა“. დეტალებზე ზელენსკის არ უსაუბრია.
ზელენსკიმ დღევანდელ მიმართვაში აგრეთვე მადლობა გადაუხადა უკრაინელ სამხედროებს.
ოფიციალური კიევი უკვე ერთ კვირაზე მეტია აწარმოებს ოპერაციას კურსკის ოლქში და აცხადებს, რომ ტყვედ აიყვანა ასობით რუსი სამხედრო და დაიკავა 1000 კვადრატული კილომეტრის ტერიტორია.
