ამერიკის შეერთებული შტატების კონგრესში მოქმედი ევროპის უსაფრთხოებისა და თანამშრომლობის კომისიის (რომელიც „ჰელსინკის კომისიის“ სახელით არის ცნობილი) წევრები ბაიდენის ადმინისტრაციას მოუწოდებენ, დაასანქცირონ ბიძინა ივანიშვილი, რომელიც კრიტიკის განსაკუთრებული ობიექტი გახდა საქართველოს ევროპული გზიდან გადხვევისა და ქვეყნის მზარდად ავტორიტარული მართვის გამო.

დემოკრატი და რესპუბლიკელი კონგრესმენების ერთობლივ წერილში ასევე საუბარია იმის შესახებ, რომ თაღლითური ქოლ-ცენტრების ქსელი “ქართულ ოცნებას” ზურგს უმაგრებს.

წერილში, რომლის ადრესატი ამერიკის სახელმწიფო მდივანი ენტონი ბლინკენია, კომისიის რესპუბლიკელი და დემოკრატი ლიდერები ფინანსური სანქციების დაწესებას ითხოვენ ივანიშვილზე და მასთან დაახლოებულ წრეზე, რათა პასუხი გაეცეს „კორუფციისა და მავნე ზეგავლენის საკვანძო კერებს საქართველოში“.

წერილის ავტორები არიან რესპუბლიკელი ჯო უილსონი, კომიტეტის თავმჯდომარე; დემოკრატი სტივ კოენი, რესპუბლიკელი რიჩარდ ჰადსონი და ასევე რესპუბლიკელი მარკ ვიზი.

„გვწამს, რომ ეს სანქციები სრულ შესაბამისობაშია ჩვენს კანონპროექტთან, „MEGOBARI Act“-თან“, — წერენ კონგრესმენები წერილში.

კანონპროექტი, რომელიც „MEGOBARI Act“-ის სახელით არის ცნობილი და რომლის ავტორია რესპუბლიკელი კონგრესმენი ჯო უილსონი, თვის დასაწყისში კონგრესის საგარეო საქმეთა კომიტეტმა სრული ორპარტიული მხარდაჭერით მიიღო. ის ითვალისწინებს „ქართული ოცნების“ პოლიტიკური ლიდერებისა და მთავრობის წევრების სანქცირებას, ასევე, ბიზნესწრეების წარმომადგენლებისთვის და სამართალდამცავი და უსაფრთხოების სამსახურების თანამშრომლებისთვის შეზღუდვების დაწესებას. სავარაუდოდ, კანონპროექტისა და ახალი საკანონმდებლო ზომების მიღების განხილვა და გატარება სექტემბრიდან განახლდება.

„ეს ზომები გააძლიერებს დემოკრატიულ პროცესებს, ადამიანის უფლებების დაცულობასა და კანონის უზენაესობას საქართველოში და კიდევ ერთხელ გაუსვამს ხაზს, რომ შეერთებული შტატები ერთგულად და მტკიცედ უჭერს მხარს საქართველოს ევროატლანტიკურ ინტეგრაციას, უპირისპირდება ავტორიტარული რეჟიმების და განსაკუთრებით, რუსეთის გავლენას“, — წერენ კონგრესმენები.

ბაიდენის ადმინისტრაციამ სავიზო შეზღუდვები დააწესა კონკრეტულ პირებზე საქართველოში, რომელნიც „პასუხისმგებელნი ან ხელშემწყობები არიან ქართული დემოკრატიისთვის ძირის გამოთხრის საქმეში“, სავიზო შეზღუდვები შეეხო დასანქცირებული პირების ოჯახის წევრებსაც.

როგორც კონგრესმენების ორპარტიული ჯგუფი ამბობს, „მოვლენათა განვითარების ტემპი და სიმწვავე მიუთითებს, რომ მეტი ზომებია მისაღები და სასწრაფოდ უნდა იქნას დაცული საქართველოს მოსახლეობა“.

საკმაოდ მკაცრია კონგრესმენების ლექსიკა ქართული ოცნების ლიდერებისა და მათი ქმედებების მიმართ.

„ცხადი უნდა გახდეს, რომ კორუფციისა და მავნე გავლენების მთავარი გამტარები ქვეყნის შიგნით თუ სხვა ანტიდასავლურ ძალებთან ალიანსში თავისუფლად ვერ უნდა ახერხებდნენ ნადირობას ქართველ ხალხზე და მიზანმიმართულად არ უნდა ესხმოდნენ თავს დემოკრატიას“, — წერენ კონგრესმენები.

კონგრესმენების წერილში ასევე ნახსენებია „თაღლითური ქოლ-ცენტრები“, რომლებიც მთელი მსოფლიოს მასშტაბით მოქმედებენ და მათი თქმით, ეს არის წყარო “შავი ფულისა, რომელიც ზურგს უმაგრებს „ქართული ოცნების“ სისტემას“.

„გვწამს, რომ სახელმწიფო დეპარტამენტმა, შეერთებული შტატებისა და მეგობარი ქვეყნების სამართალდამცველ ორგანოებთან თანამშრომლობით, გარდაუვალად,  სწრაფად, დაუყოვნებლივ უნდა მიიღოს სისტემური ზომები მსგავსი ქოლ-ცენტრების ქსელის წინააღმდეგ საერთაშორისო მასშტაბით, რომ აღმოიფხვრას მათი ქმედებები“, – წერია კონგრესმენების წერილში.

ასევე ნახეთ:

განიხილება სანქციები მათზეც, ვინც ადამიანის უფლებების დარღვევაშია ჩართული – ო’ბრაიენი