აშშ-ის პრეზიდენტი ჯო ბაიდენი ექსპრეზიდენტ ტრამპზე თავდასხმის შემდეგ ვაშინგტონში დაბრუნდა და საზოგადოებას მიმართა. ბაიდენმა განაცხადა, რომ ტრამპს ტელეოფნით ესაუბრა და მოხარულია, რომ თავს კარგად გრძნობს.
ბაიდენის თქმით, გამოძიება ჯერ კიდევ საწყის ეტაპზეა და ყველა მხარეს მოუწოდა, თავი შეიკაონ თავდამსხმელის მოტივებსა და შესაძლო აფილაციაზე სპეკულაციებისგან და არ გააკეთონ ნაადრევი დასკვნები:
„ყველას მოვუწოდებ, გთხოვთ, არ გააკეთოთ ნაადრევი დასკვნები მის მოტივებსა და აფილაციაზე. მიეცით გამოძიების ფედერალურ ბიუროს საშუალება, თავიანთი საქმე გააკეთონ. განკარგულება გავეცი, რომ გამომძიებლებს ხელი მიუწვდებოდეთ ყველა რესურსზე, რაც შესაძლოა დასჭირდეთ“, — განაცხადა ჯო ბაიდენმა.
ამასთან, ბაიდენმა აღნიშნა, რომ გასცა ბრძანება, უსაფრთხოების ზომებში შესაძლო ხარვეზებზე დამოუკიდებელი გამოძიება წარიმართოს. მისი თქმით, საიდუმლო სერვისს დაავალა, ტრამპის უსაფრთხოების უზრუნველსაყოფად ყველაფერი გააკეთონ:
„საიდუმლო სამსახურის დირექტორს მივეცი განკარგულება, განიხილოს უსაფრთხოების ყველა ზომა. დამოუკიდებელი გამოძიების შეფასებას ამერიკელ ხალხს გავუზიარებთ. ახლა უნდა გავერთიანდეთ, როგორც ერი“, — აღნიშნა აშშ-ის პრეზიდენტმა.
გარდა ამისა, ბაიდენმა აღნიშნა, რომ ოვალური კაბინეტი მომხდართან დაკავშირებით დღეს საგანგებო შეხვედრას გამართავს.
ამომრჩეველთან შეხვედრისას აშშ-ის პრეზიდენტობის კანდიდატისა და ყოფილი პრეზიდენტის, დონალდ ტრამპის მოკვლა სცადეს. თავდასხმის შემდეგ გავრცელებულ განცხადებაში ტრამპი წერს, რომ მას ტყვია ყურის ზედა ნაწილზე მოხვდა, თუმცა თავს კარგად გრძნობს.
ვრცლად წაიკითხეთ: ტრამპზე თავდამსხმელის ვინაობა ცნობილია