რუსეთმა და ჩრდილოეთ კორეამ ყოვლისმომცველი სტრატეგიული პარტნიორობის შესახებ შეთანხმება გააფორმეს.

დოკუმენტს ხელი მოეწერა რუსეთის პრეზიდენტ ვლადიმერ პუტინის ფხენიანში ვიზიტის ფარგლებში.

„შეთანხმება, სხვა საკითხებთან ერთად, ითვალისწინებს ურთიერთდახმარებას ერთ-ერთი მხარის მიმართ აგრესიის შემთხვევაში“, — განაცხადა ვლადიმერ პუტინმა და დასძინა, რომ რუსეთი არ გამორიცხავს „სამხედრო-ტექნიკურ თანამშრომლობას“ ჩრდილოეთ კორეასთან ხელმოწერილი დოკუმენტის შესაბამისად.

„რია ნოვოსტის“ ცნობით, ამ კონტექსტში პუტინმა ყურადღება გაამახვილა შეერთებული შტატებისა და ნატოს სხვა ქვეყნების განცხადებებზე, რომელიც შეეხებოდა უკრაინისთვის მაღალი სიზუსტის შორეული სისტემების, F-16 თვითმფრინავების და სხვა იარაღისა და აღჭურვილობის მიწოდებას რუსეთის ტერიტორიებზე დარტყმისთვის.

„ეს მხოლოდ განცხადებები არ არის, ეს უკვე ხდება და ეს ყველაფერი არის დასავლეთის ქვეყნების მიერ სხვადასხვა საერთაშორისო ვალდებულებების ფარგლებში მიღებული შეზღუდვების უხეში დარღვევა“, — განაცხადა პუტინმა და დასძინა, რომ მოსკოვი და ფხენიანი დამოუკიდებელ საგარეო პოლიტიკას ატარებენ და შანტაჟს არ ექვემდებარებიან.

გარდა ამისა, პუტინის ფხენიანში ვიზიტისას მხარეებს შორის ხელი მოეწერა მთავრობათაშორის შეთანხმებებს სასაზღვრო-საგზაო ხიდის მშენებლობასა და ჯანდაცვის, სამედიცინო განათლებისა და მეცნიერების სფეროში თანამშრომლობის შესახებ.