ახალი ამბები

კრამონი: დაუწესდეთ სანქციები ივანიშვილს და დეპუტატებს, საქართველოს ჩამოერთვას კანდიდატის სტატუსი

1 მაისი, 2024 •
კრამონი: დაუწესდეთ სანქციები ივანიშვილს და დეპუტატებს, საქართველოს ჩამოერთვას კანდიდატის სტატუსი

ევროპარლამენტარი ვიოლა ფონ კრამონი გამოეხმაურა ჯოზეფ ბორელის განცხადებას, დღეს, პირველ მაისს, თბილისში გამთენიისას ანტირუსული პროტესტის ჩასახშობად ხელისუფლების მიერ ძალის გამოყენებასთან დაკავშირებით.

კრამონის თქმით, განვითარებული მოვლენების საპასუხოდ აუცილებელია გადაიდგას კონკრეტული ნაბიჯები.

“ჩვენ გვჭირდება კონკრეტული შედეგები!

  • ევროკავშირის კანდიდატის სტატუსის ჩამორთმევა;
  • ქართული პროექტების დაფინანსების შეწყვეტა;
  • ბიძინა ივანიშვილის სანქცირება;
  • მგზავრობის აკრძალვა იმ დეპუტატებისთვის, რომლებიც ხმას აძლევენ რუსულ კანონს” – წერს ევროპარლამენტარი X-ზე.

 


30 აპრილის საღამოს და 1 მაისს, გამთენიისას, თბილისში სპეცრაზმმა ძალა გამოიყენა მშვიდობიანი მომიტინგეების წინააღმდეგ, რომლებიც პარლამენტთან რუსულ კანონს აპროტესტებდნენ.

ფიზიკურად გაუსწორდნენ არაერთ მოქალაქეს, ასევე არაერთხელ გაუშვეს ცრემლსადენი გაზი, რის შედეგადაც დაშავდნენ მოქალაქეები, თუმცა ისინი კვლავ განაგრძობდნენ რუსთაველის გამზირზე შეკრებას.

შსს-ს ინფორმაციით, გასულ ღამეს თბილისში გამართულ საპროტესტო აქციაზე ადმინისტრაციული წესით 63 ადამიანი დააკავეს.

 

მასალების გადაბეჭდვის წესი