აფხაზეთის დე ფაქტო რესპუბლიკის პრეზიდენტმა ასლან ბჟანიამ სოციალურ-ეკონომიკური კვლევის ცენტრის მიერ გამართულ მრგვალ მაგიდაზე, სახელწოდებით “რუსეთი – აფხაზეთი. ურთიერთობების უსაფრთხოება და განვითარება წინასაარჩევნოდ”, განაცხადა, რომ “სერიოზული განვითარების შესაძლებლობა მხოლოდ რუსეთს უკავშირდება”.
“დემოკრატია არა მხოლოდ თავისუფლება, არამედ პასუხისმგებლობაცაა. აფხაზეთის საინფორმაციო სფეროში სრული უპასუხისმგებლობაა. ასეთ პირობებში აფხაზეთის საგარეო საქმეთა სამინისტროს ხელმძღვანელმა ინალ ბატუვიჩმა [არძინბა] სახელმწიფოს პოზიცია უფრო ნათლად უნდა მიაწოდოს საზოგადოებას. ნათლად უნდა ითქვას, რომ ჩვენი სერიოზული განვითარების შესაძლებლობა მხოლოდ რუსეთს უკავშირდება. ბევრი ოპოზიციონერისთვის ხელისუფლების კრიტიკა ძირითადად ძალაუფლებისთვის ბრძოლას უკავშირდება. ეს ყველაფერი ეწინააღმდეგება ჩვენი და რუსეთის ძმობას, ჩვენს ერთადერთი მოკავშირისა და უსაფრთხოების გარანტს” – განაცხადა დე ფაქტო პრეზიდენტმა.
ბჟანია დარწმუნებულია, რომ მშვიდობის უზრუნველყოფა მოითხოვს ყოველდღიურ შრომას.
“ჩვენ და რუსეთი უსაფრთხოების საერთო სისტემას ვაშენებთ. ჩვენ არ შეგვიძლია დავუშვათ ისეთი ორგანიზაციების, როგორიც არის USAID, აფხაზეთში მოღვაწეობდნენ. დროა, ეს ამბავი დასრულდეს” ,- განაცხადა მან.
ამასთან, დე ფაქტო პრეზიდენტის თქმით, რუსეთსა და აფხაზეთს შორის არსებობს “უხეში ზღვარი”, რაც სავსებით ნორმალურია სახელმწიფოებს შორის ურთიერთობებში.
“ზოგჯერ საუკეთესო იდეებიც, სამწუხაროდ, არცთუ ისე კარგი გამოდგება. მაგალითად, ზოგიერთი ოპოზიციური ფიგურის არცთუ ისე ობიექტური პოზიციის გამო ვერ შევძელით ოჩამიჩირის რეგიონში საერთო სამხედრო ბაზის მშენებლობა” ,- აღნიშნავს ბჟანია.
შეხვედრაზე დე ფაქტო რესპუბლიკის სოციალურ-ეკონომიკური ცენტრის ხელმძღვანელმა ოლეგ დამენიამ თქვა, რომ რუსეთის საპრეზიდენტო არჩევნები, რომელიც 17 მარტს ჩატარდება, საბედისწერო ხასიათისაა როგორც რუსეთისთვის, ასევე აფხაზეთისთვის.
“ჩვენ ვართ მოწმენი, როგორ უწყობენ ხელს ანგლო-საქსები მსოფლიოში დაძაბულობის ესკალაციას, რათა შექმნან ერთპოლარული სამყარო აშშ-ის მეთაურობით. ასეთ პირობებში რუსეთის სურვილს, ჩამოაყალიბოს თანაბარი ქვეყნების სამართლიანი კონფიგურაცია აფხაზეთისთვის, ალტერნატივა არ გააჩნია. არჩევნებში მონაწილეობისას ჩვენთვის მნიშვნელოვანია არ რიცხობრივი მაჩვენებელი, არამედ ინფორმირებულობა ჩართულობის შესახებ, რაც რუსეთში ხდება”, – აღნიშნა დამენიამ.
ოლეგ დამენიამ დაამატა, რომ აფხაზეთის პერსპექტივა პირდაპირ დაკავშირებულია რუსეთთან.
“რუსეთში მრავალი პატარა ერი ინარჩუნებს იდენტობას. ჩვენს სტრატეგიულ მოკავშირეს აქვს უნიკალური გამოცდილება ყველა ერის კულტურული განვითარების პირობის შექმნაში. რუსეთი ჩვენი საერთო დიდი სამშობლოა”, – განაცხადა დე ფაქტო რესპუბლიკის სოციალურ-ეკონომიკური ცენტრის ხელმძღვანელმა.
მრგვალი მაგიდის სხდომაზე რუსეთის ელჩმა დე ფაქტო აფხაზეთში მიხაილ შურგალინმა აღნიშნა, რომ ხმის მიცემის პროცესი რუსეთის საპრეზიდენტო არჩევნებში “ორივე სახელმწიფოსთვის მნიშვნელოვანია”.
“პრეზიდენტ ასლან ბჟანიას, ვიცე-პრეზიდენტ ბადრე გუნბას და პრეზიდენტის ადმინისტრაციის უფროსის აბესალომ კვარჩიას წყალობით შეიქმნა შტაბი და არჩევნების დღეს, 17 მარტს, გაიხსნება 30 საარჩევნო უბანი”, – განაცხადა შურგალინმა.
სხდომაზე რუსეთის ელჩს დაუსვეს კითხვა კენჭისყრაზე აფხაზეთის მოქალაქეების მონაწილეობის შესახებ, რომლებსაც ვადაგასული რუსული პასპორტები აქვთ. შურგალინმა განაცხადა, რომ საარჩევნო უბნის თანამშრომლების მთავარი ამოცანა აფხაზეთში მცხოვრები რუსეთის მოქალაქეების ლეგალური კუთვნილების დადგენაა. იგივე ეხება შიდა რუსული პასპორტების მფლობელებსაც. “ამის საფუძველზე, ვფიქრობ, რომ აფხაზეთის ყველა მოქალაქეს, რომელიც რუსეთის მოქალაქეა, ექნება იმის შესაძლებლობა, რომ არჩევნებზე საკუთარი აზრი დააფიქსიროს”, – განაცხადა რუსეთის ელჩმა დე ფაქტო აფხაზეთში მიხაილ შურგალინმა.
