რუსეთმა სომხეთისგან „გარკვეული გარანტიები“ უნდა მიიღოს, ამბობს კრემლის პრესსპიკერი, დიმიტრი პესკოვი.
ეს განცხადება მან სომხეთის მიერ საერთაშორისო სისხლის სამართლის, იგივე ჰააგის სასამართლოს გადაწყვეტილების რატიფიკაციასთან დაკავშირებით გააკეთა. საქმე ის არის, რომ სასამართლოს გაცემული აქვს პუტინის დაკავების ორდერი და სომხეთი ვალდებული იქნება, დააკავოს რუსეთის პრეზიდენტი, თუ იგი სომხეთის ტერიტორიაზე აღმოჩნდება.
პესკოვის თქმით, სომხეთის შეერთება სტატუსთან ნეგატიურად აისახება მოსკოვისა და ერევნის ურთიერთობებზე. თუმცა რუსეთმა უნდა მიიღოს „გარკვეული გარანტიები“. მას არ დაუკონკრეტებია, მაგრამ „გარანტიებში“ იგულისხმება, რომ პუტინს, თუ ის სომხეთში იქნება, არ დააკავებენ. მართალია, პუტინის ვიზიტი სომხეთში ოფიციალურად არ იგეგმება, პესკოვს ჰკითხეს, შესაძლებელია თუ არა მისი განხორციელება, რაზეც მან უპასუხა:
„ვამბობდით, რომ ახალი რეალობა, რაც წარმოიქმნა ამ სტატუტისთან სომხეთის მიერთების შემდეგ, არ შეიძლება, უარყოფითი გავლენა არ მოახდინოს ჩვენს ურთიერთობებზე. რა თქმა უნდა, მნიშვნელოვანია მივიღოთ გარკვეული გარანტიები ჩვენი სომეხი პარტნიორებისგან. ეს საკითხი ჯერ გადასაწყვეტია დიალოგის ფარგლებში, რისი მომხრენიც ჩვენ ვართ“, – ციტირებს მას „ლენტა“.
სომხეთი ჰააგის სასამართლოს სტატუტს 1 თებერვლიდან შეუერთდა. სომხეთის პრემიერმა, ნიკოლ ფაშინიანმა პირდაპირ არ უპასუხა კითხვას, დააკავებენ თუ არა პუტინს სომხეთში და აღნიშნა, რომ მისი გადასაწყვეტი არაა, თუ ვის დააკავებენ სომხეთში.
ვლადიმერ პუტინის დაპატიმრების ორდერი
2023 წლის 17 მარტს, უკრაინაში სრულმასშტაბიანი შეჭრიდან ერთი წლის შემდეგ, ჰააგის სასამართლომ რუსეთის პრეზიდენტის, ვლადიმერ პუტინის დაპატიმრების ორდერი გასცა.
ბრალდება პუტინის მიმართ უკრაინიდან ბავშვების უკანონო დეპორტაციაა – ომის დაწყებიდანვე, რუსულ ძალებს უკანონოდ გაჰყავდათ უკრაინელი ბავშვები ოკუპირებული ტერიტორიიდან რუსეთში. მოსკოვში ამას ჰუმანიტარული მიზეზებით ხსნიან.
პუტინთან ერთად ორდერი გაიცა მარია ლვოვა-ბელოვას დაკავებაზე, რომელსაც რუსეთში ბავშვთა ომბუდსმენის პოსტი უკავია. ორდერის გაცემისას პროკურორები დაეყრდნენ პუტინისა და ლვოვა-ბელოვას შეხვედრას, რომელზეც მათ საჯაროდ განიხილეს უკრაინიდან გატაცებული ბავშვების საკითხი.
დაზუსტებული და სანდო ცნობები, თუ კონკრეტულად რამდენი ბავშვი გაიტაცეს რუსეთში, არ მოიპოვება. თუმცა უკრაინული მხარე პერიოდულად იუწყება რამდენიმე ბავშვის დაბრუნების შესახებ.
რაც შეეხება ორდერს, მის გამო პუტინს, ფაქტობრივად, შეეზღუდა მსოფლიოს იმ ქვეყნებში ჩასვლა, რომლებიც, რუსული აგრესიის მიუხედავად, მზად იყვნენ მის მისაღებად, თუმცა რატიფიცირებული ჰქონდათ რომის სტატუტი სასამართლოს დაფუძნებაზე და შესაბამისად, ვალდებულები იქნებოდნენ, მათ იურისდიქციაში ყოფნის შემთხვევაში, პუტინი დაეპატიმრებინათ.
