ჩინურმა Chouzhou Commercial Bank-მა, რომელიც ჩინეთში მომუშავე რუსი იმპორტიორებისთვის „ძირითადი“ იყო, კლიენტებს რუსეთთან ოპერაციების შეჩერების შესახებ აცნობა, იუწყება „მედუზა“ „ვედომოსტიზე“ დაყრდნობით.

ერთ-ერთი ბიზნესმენი ეუბნება „ვედომოსტის“, რომ წინა კვირას მიიღეს შეტყობინება რუსულ და ბელარუსულ ორგანიზაციებთან ყველანაირი ურთიერთობის შეწყვეტის შესახებ.

გამოცემის სხვა რესპონდენტი კი ამბობს, რომ დეკემბერში ბანკმა უარი განაცხადა, ემუშავა ოპერაციებზე, რომლებიც გულისხმობს რუსეთში რიგი სანქცირებული პროდუქციის შეტანას, ხოლო რამდენიმე კვირაში აუწყა ოპერაციების სრულ შეჩერებაზე.

ამასთან ერთად, ბანკი უარს ამბობს რუსულ ორგანიზაციებთან მუშაობაზე არა მარტო საერთაშორისო საბანკო გადარიცხვების სისტემა „სვიფტით“, არამედ მისი ჩინური და რუსული ანალოგებითაც.

გარდა ამისა, მედია აგრეთვე წერს, რომ სხვა ჩინურმა ბანკებმაც გაამკაცრეს რუს კლიენტებთან მუშაობის წესები და ითხოვენ,  კლიენტმა დაადასტუროს, რომ არ აქვს კონტაქტები სანქცირებულ პირებთან და ორგანიზაციებთან, არ გამოიყენებს პროდუქტს რუსული სამხედრო ინდუსტრიისთვის და არ ჩაიტანს მას ანექსირებულ ყირიმში.

იანვარში „ბლუმბერგი“ აღნიშნავდა, რომ ჩინური სახელმწიფო ბანკები ზღუდავენ რუსეთთან ურთიერთობებს, აშშ-ის მიერ მეორეული სანქცირების საფრთხის გამო.