28 დეკემბერს გამართულ პრესკონფერენციაზე საქართველოს კინოინსტიტუტის წარმომადგენლებმა ისაუბრეს 2023 წელს კინოში მიმდინარე პროცესებზე, გამოწვევებსა და სამომავლო გეგმებზე. საქართველოს კინოინსტიტუტი კინემატოგრაფისტთა გაერთიანებაა, რომელიც მხარს უჭერს დამოუკიდებელი ქართული კინოს განვითარებას და ეხმარება კინემატოგრაფისტებს პროექტების განხორციელებაში.
ამავე მიზნით, ბერლინის 74-ე კინოფესტივალზე საქართველოს კინოინსტიტუტი ქართული სტენდით იქნება წარმოდგენილი:
„ეს იქნება პრეცედენტი, როდესაც დამოუკიდებელი ინსტიტუცია წარმოდგენილი იქნება ცალკე სტენდით ბერლინში. ზოგადად, საქართველოში კინოს დაფინანსება არის ძალიან მცირე (საშუალოევროპული ფილმის დაფინანსების ტოლფასია მთლიანად კინოში არსებული დაფინანსება), ამიტომ, ქართული ფილმების უმრავლესობა არის ევროპული კოპროდუქცია, ეს ნიშნავს იმას, რომ ფილმები დამატებით დაფინანსებას იღებენ ევროპული ფონდებისგან. სწორედ ამიტომ გავხსენით ეს კარი და მაქსიმალურად დავეხმარებით პროექტებს, რათა მოიძიონ დამატებითი დაფინანსება ევროპაში”, – თქვა დავით ვაშაძემ, რომელიც იქნება ქართული სტენდის ხელმძღვანელი „ბერლინალეზე”.
შესავალ სიტყვაში რეჟისორმა და ორგანიზაციის პრეზიდენტმა ნუცა ალექსი-მესხიშვილმა ისაუბრა საქართველოს კინოინსტიტუტსა და მიზნებზე:
„ძალიან მოკლე დროში კინოინსტიტუტმა შეძლო და წარდგება სტენდით ბერლინის კინოფესტივალზე. ეს პირდაპირ ეხმიანება ჩვენს უმთავრეს მიზანს: ჩვენი ურთიერთობებითა და აქამდე არსებული კონტაქტებით, მსოფლიო კინოს პროფესიულ სამყაროში, ხელი შევუწყოთ იმ კოლეგებს, რომელთაც სხვადასხვა ეტაპზე აქვთ თავიანთი პროექტები.”
